Ułada kali i zhulaje z Eŭropaj ŭ karty, dyk tolki na hrošy

Apazycyja radujecca: maŭlaŭ, Eŭropa ŭziała na ŭzbrajeńnie našyja patrabavańni da režymu dy jašče i svajo dałučyła: maratoryj na palitviaźniaŭ. Havorka idzie pra toj varyjant "darožnaje karty", što pryviezła na pieramovy ŭ Miensk delehacyja Eŭrakamisii na čale z Chjuha Minhareli. Praŭda, sam jon pradbačliva maŭčyć, a rolu spoŭksmena vykonvaje pieravažna Anatol Labiedźka :)

Palitolah Valer Karbalevič skazaŭ mnie: "Ciažka ŭjavić, što biełaruskaje kiraŭnictva pojdzie na sastupki. Chiba što na kasmetyčnyja". Ź inšaha boku, kaža jon,

ciažka ŭjavić i toje, što Eŭraźviaz cieraź piać miesiacaŭ adnović vizavyja sankcyi.

Na dumku eksperta, ułady mohuć, naprykład, prytarmazić ci farmalna źmiakčyć novy zakon ab ŚMI. Niezaležnuju presu spraŭna dušyli i pry starym zakonie.

Dadamo: mohuć farmalna skarektavać i Vybarčy kodeks. Naprykład, zrobiać čatyry dni daterminovaha hałasavańnia zamiest piaci. Dla zavualavanaj prymusoŭki ŭsio adno zastaniecca bahata času. A miž tym — sastupka. Nahadaju, u pakiecie apazycyjnych prapanoŭ — źmiena vybarčaha zakanadaŭstva, źmiakčeńnie medyjnaj palityki, umoŭ dziejnaści partyj dy treciaha sektaru, skasavańnie "palityčnych" artykułaŭ Kryminalnaha kodeksu.

Zrešty, maratoryj na palitviaźniaŭ — akurat realistyčnaja ŭmova. Nie abaviazkova pajać terminy. Va ŭładaŭ bahaty arsenał zdušeńnia palityčnaje alternatyvy praz taktyku drobnaha fołu: štrafy, padatkavyja deklaracyi, administracyjnyja zabarony i h.d.

Karaciej, cudaŭ demakratyzacyi čakać nie vypadaje, ale niejkija krychi dziela mahčymaści zachavać tvar Eŭropa maje šaniec atrymać.

"Kali nia zdarycca niečaha brutalnaha kštałtu novych palityčnych pasadak, to režym prypynieńnia sankcyj mohuć, naprykład, praciahnuć jašče na paŭhodu, potym jašče", — miarkuje Valer Karbalevič.

Nieaficyjnyja razmovy z dyplamatami-zachodnikami sapraŭdy pakidajuć uražańnie, što ŭ ichnich stalicach navažanyja pad luboj markaj padtrymlivać kvoły praces narmalizacyi stasunkaŭ z "apošniaj dyktaturaj".

I na hety praces buduć upłyvać, mahčyma, nia stolki punkty "darožnaje mapy", kolki hieapalityčnyja dy finansava-ekanamičnyja čyńniki. I najpierš — rasiejski. Ci daciśnie Maskva Łukašenku ŭ pytańniach pryznańnia Abchazii z Paŭdniovaj Asiecijaj, adzinaj systemy SPA, ahulnaje valuty? Jak adabjecca na ekanamičnaj palitycy biełaruskaha kiraŭnictva finansavy kryzis? Nakolki padšturchnie da rynkavych pieraŭtvareńniaŭ, pryvatyzacyi — inačaj kažučy, nakolki šyroka pojdzie siudy zachodni kapitał?

Karaciej, budzie daminavać prykry dla ramantykaŭ demakratyčnaj idei palityčny prahmatyzm. Ci mo' heta — realizm pryncypu "kropla kamień točyć" va ŭmovach, kali niama vaharoŭ, kab toj vałun pierakulić?

Dobra ŭžo toje, što apazycyja aperatyŭna sfarmulavała svaje prapanovy i de-fakta ŭklinavałasia, nakolki mahčyma, u dyjaloh Zachadu z režymam, miarkuje palitolah Jury Čavusaŭ. Jaje misija — kansultavać zamiežnikaŭ (chacia tut jość niebiaśpieka, što tytulnyja apazycyjanery buduć ciahnuć koŭdru na siabie) dy kantralavać datrymańnie aryjenciraŭ taje "darožnaje karty".

Sytuacyja, kali palityčnych apanentaŭ nia bjuć dručkami dy nie kidajuć za kraty — heta dla našych realijaŭ, kładučy ruku na serca, užo niamała. Čym jano tak dolej, tym słabiejšyja abcuhi strachu.

A tym časam budzie spakvala kapać ekanamičny krot. Krainie nakanavana mianiacca, chaj sabie i nie pa lubych ramantykam (ci maksymalistam) schiemach skidańnia dyktaturaŭ.

Jak ni cynična, ale Eŭropa zdolnaja anhažavać biełaruskuju kiroŭnuju klasu tolki praź jaje skurny interas.

Patrabavańni Zachadu tutejšaja viarchoŭka razumieje chiba što ŭ adnoj płaščyni: a što my z hetaha pajmiejem? Tak što "darožnaja karta" musić być vymiaralnaj nia tolki ŭ sensie vysokich demakratyčnych kaštoŭnaściaŭ, ale i ŭ dalarach dy eŭra. Inačaj svaju mapu, u rublach dy kubametrach hazu, nakinie Kreml.

Karaciej, Miensk kali i siadzie hulać z Eŭropaj u niejkija karty, dyk vyklučna na hrošy. Inšaja reč, što ŭ luboj hulni jość momant niepradkazalnaści. I ajčynnaja hramada taksama zdolnaja ŭpłyvać na hety siužet. Tak što adkiniem zmročny fatalizm.

ZY. Pakul pisaŭsia hety post, vice-premjer Kabiakoŭ zajaviŭ na pieramovach ź Minhareli, što Miensk zacikaŭleny ŭ "paŭnavartasnaj dy praciahłaj supracy z Eŭraźviazam z uporam na ekanamičny składnik". Karaciej, hulajma na hrošy! :)

• 0
• 0
• 0
• 0
• 0
• 0
• 0
• 0