Navukoŭcy padazrajuć, što znajšli na Marsie zakamianiełyja nory čarviakoŭ — FOTA, zroblenaje marsachodam
Kamiery marsachoda Curiosity zafiksavali dziŭnyja struktury, jakija mohuć mieć bijałahičnaje pachodžańnie, paviedamlaje partał Space.com.
Pieršapačatkova ich razhladzieli na čorna-biełych fotazdymkach navihacyjnych kamier. Ale kamanda prajekta paličyła znachodku nastolki cikavaj, što dała rovieru kamandu viarnucca ŭ punkt zdymki i zachavać zahadkavyja abjekty z dapamohaj kalarovaje kamiery.
Znachodka maje vyhlad «pałačak» taŭščynioj 1-2 milimietry i daŭžynioj da 5 milimietraŭ. Šmat heta ci mała? Viadoma, što takija «ślady» zanadta vialikija dla bakteryj. Kali heta ŭsio ž ślady žyćcia, to, vidavočna, makraskapičnaha.
Darečy, mienavita hetak na Ziamli vyhladajuć skamianiełyja nory dahistaryčnych čarviakoŭ.
Jość, adnak, i mienš zachaplalnaja viersija: «trubačkami» mohuć akazacca kankrecyi — minieralnyja struktury, jakija ŭźnikajuć biez udziełu žyćcia.
«Kjuryjosici» abstalavany raznastajnaj aparaturaj dla chimičnaha analizu hruntu, naprykład, kompleksam instrumientaŭ ChemCam i renthienaŭskim śpiektromietram APXS. Ale vyznačyć, ci majuć uzory bijałahičnaje pachodžańnie — niaprostaja zadača navat dla paŭnavartasnych ziamnych łabaratoryj.
Marsachod Curiosity ŭjaŭlaje saboj aŭtanomnuju chimičnuju łabaratoryju. Aparat byŭ zapuščany ŭ 2011 hodzie ŭ miežach misii «Marsijanskaja navukovaja łabaratoryja» i pryziamliŭsia na pavierchniu Čyrvonaje płaniety praz 254 ziamnych sutak. Zaraz jon daśleduje častku reljefa, što nosić nazvu «Chrybiet Viery Rubin».
Kamientary