Ukrainski śpiavak choča ŭdzielničać u «Jeŭrabačańni» ad Biełarusi. I pieśnia mocnaja
Jaho papiaredni klip, «Pjanaje sonca», sabraŭ u Jutubie 34 miljony prahladaŭ. 24-hadovy ŭkrainski śpiavak Alekseev maje i hołas, i vobraz. I jon choča ŭdzielničać u Jeŭrabačańni ad Biełarusi. Pieśnia nazyvajecca Forever («Nazaŭždy»).
Adnak vakoł jahonaj kandydatury adrazu ŭźnikła sprečka. Alekseeva mohuć nie dapusić da adboru, pakolki, mahčyma, jon parušyŭ rehłamient.
Zhodna z Pałažeńniem ab praviadzieńni adboru, «u prajekcie moža ŭdzielničać pieśnia (muzyka i (abo) tekst), jakaja nie była kamiercyjna realizavana da 1 vieraśnia 2017 h., raspaŭsiudžanaja praź sietku internet, a taksama na lubych nośbitach (aŭdyjokasiety, kampakt-dyski, mini-dyski i inš.) pry prodažy ci inšym sposabam, pieradadziena ŭ radyjo- abo televizijny efir, abo pa kabieli, a taksama vykanana publična».
Miž tym Alekseev vykonvaŭ «Navsiehda», rasiejskamoŭnuju viersiju svajoj pieśni Forever ŭ časie tura «Pjanaje sonca».
U pres-słužbie Biełteleradyjokampanii Tut.by paviedamili, što im užo viadoma pra hetyja fakty i jany praviarajuć i aceńvajuć situacyju.
Pa viersii śpievaka, raniej na kancertach u Kijevie i Staŭrapali hučaŭ «kavałak pieśni «Navsiehda», vykanany z absalutna inšym tekstam i ź inšaj miełodyjaj».
Alekseev (sapraŭdnaje imia — Mikita Alaksiejeŭ) staŭ paŭfinalistam ukrainskaha teleprajekta «Hołas krainy» i zdabyŭ papularnaść na postsavieckaj prastory paśla vychadu pieśni «Ṕjanoje sołncie».
Śpiavaje jon pieravažna pa-rasiejsku.
Pieśnia «Navsiehda» ŭ svajoj rasiejskaj viersii ŭžo nabrała 3,2 miljona prahladaŭ, a ŭ anhłamoŭnaj Forever — kala 60 tysiač. Pieśni biełaruskich kankurentaŭ majuć našmat mienš prasłuchoŭvańniaŭ.
Pieršy tur biełaruskaha adboru na «Jeŭrabačańnie» adbudziecca siońnia, 11 studzienia.
Akramia Alekseeva, na «Jeŭrabačańnie» ad Biełarusi chočuć pajechać Shuma, što śpiavaje ŭ biełaruskim etna-styli, Hiuneš, Juzary, repier Vožyk, hurt Napoli dy jašče amal čatyry dziasiatki vykanaŭcaŭ.
Ciapier čytajuć
Polski błohier naviedaŭ Biełaruś — niekatoryja jaho vysnovy vas ździviać10
Kamientary