Byłaja premjerka Litvy pieraścierahaje ad dypłamatyčnaha dyjałohu ź Minskam
Pieramovy ź minskim režymam na čale z Alaksandram Łukašenkam — niebiaśpiečny krok, miarkuje Inhryda Šymanicie.
U toj čas jak partyja «Śvitanak nad Niomanam», jakaja ŭvachodzić u kiroŭnuju kaalicyju ŭ Litvie, namiakaje na nieabchodnaść praviadzieńnia pieramovaŭ ź Biełaruśsiu na dypłamatyčnym uzroŭni, byłaja premjer-ministarka Inhryda Šymanicie zajaŭlaje, što nie ździŭlenaja žadańniami partnioraŭ pa kaalicyi, paviedamlaje Delfi.lt.
Adnak pieramovy ź minskim režymam na čale z Alaksandram Łukašenkam — niebiaśpiečny krok, pakolki mienavita da hetaha imkniecca niedemakratyčna vybrany kiraŭnik Biełarusi, ličyć jana.
«Niadziŭna, što heta idzie mienavita ad hetych kaalicyjnych partnioraŭ, tamu što hetyja kaalicyjnyja partniory ličać, što treba siabravać z usiakaha rodu ahresarami, dyktatarami (…). Heta vielmi niebiaśpiečny šlach u tym sensie, što mienavita da hetaha imkniecca Łukašenka», — prakamientavała situacyju Inhryda Šymanicie 28 listapada ŭ efiry Žinių radijas.
«Sam ministr zamiežnych spraŭ Kiastucis Budrys skazaŭ pra heta nadzvyčaj jasna. Bo paśla sfalsifikavanych i skradzienych vybaraŭ 2020 hoda my i sami razumiejem, što takoje lehitymnaść režymu. Łukašenka nie z tych ludziej, jakim by vielmi padabałasia, što jaho nichto nie ličyć carom i aficyjna nie pryznaje», — dadała Šymanicie.
U suviazi z praciaham zapusku mieteazondaŭ z kantrabandaj ź Biełarusi lidar partyi «Śvitanak nad Niomanam» Remihijus Žemajtajcis nieadnojčy zajaŭlaŭ ab nieabchodnaści praviadzieńnia pieramovaŭ ź Minskam na palityčnym uzroŭni.
Kamientary