Былая прэм'ерка Літвы перасцерагае ад дыпламатычнага дыялогу з Мінскам
Перамовы з мінскім рэжымам на чале з Аляксандрам Лукашэнкам — небяспечны крок, мяркуе Інгрыда Шыманіце.
У той час як партыя «Світанак над Нёманам», якая ўваходзіць у кіроўную кааліцыю ў Літве, намякае на неабходнасць правядзення перамоваў з Беларуссю на дыпламатычным узроўні, былая прэм’ер-міністарка Інгрыда Шыманіце заяўляе, што не здзіўленая жаданнямі партнёраў па кааліцыі, паведамляе Delfi.lt.
Аднак перамовы з мінскім рэжымам на чале з Аляксандрам Лукашэнкам — небяспечны крок, паколькі менавіта да гэтага імкнецца недэмакратычна выбраны кіраўнік Беларусі, лічыць яна.
«Нядзіўна, што гэта ідзе менавіта ад гэтых кааліцыйных партнёраў, таму што гэтыя кааліцыйныя партнёры лічаць, што трэба сябраваць з усякага роду агрэсарамі, дыктатарамі (…). Гэта вельмі небяспечны шлях у тым сэнсе, што менавіта да гэтага імкнецца Лукашэнка», — пракаментавала сітуацыю Інгрыда Шыманіце 28 лістапада ў эфіры Žinių radijas.
«Сам міністр замежных спраў Кястуціс Будрыс сказаў пра гэта надзвычай ясна. Бо пасля сфальсіфікаваных і скрадзеных выбараў 2020 года мы і самі разумеем, што такое легітымнасць рэжыму. Лукашэнка не з тых людзей, якім бы вельмі падабалася, што яго ніхто не лічыць царом і афіцыйна не прызнае», — дадала Шыманіце.
У сувязі з працягам запуску метэазондаў з кантрабандай з Беларусі лідар партыі «Світанак над Нёманам» Рэмігіюс Жэмайтайціс неаднойчы заяўляў аб неабходнасці правядзення перамоваў з Мінскам на палітычным узроўні.
Цяпер чытаюць
Польскі блогер наведаў Беларусь — некаторыя яго высновы вас здзівяць19
Каментары