Usio, što treba viedać pra Vialikdzień i padrychtoŭku da jaho
Vialikdzień nie za harami: sioleta chryścijanie śviatkujuć jaho 16 krasavika. Nahadvajem pra tradycyjnyja spravy, jakija treba zrabić da niadzieli.
Na fotach — supracoŭniki «Našaj Nivy» vinšujuć vas z nadychodziačym śviatam
Adkul rastuć «nohi» śviata?
Vialikdzień, abo Pascha, važnaje śviata chryścijan, uviedzienaje ŭ honar Uvaskresieńnia Isusa Chrysta. Akramia taho, da hetaha dnia pryviazana šmat inšych padziej, jakija adznačajucca ŭ paśladoŭnaści, apisanaj u jevanhiellach: Łazarava subota, Vialikaja piatnica, Čysty čaćvier i inšyja. Tyja, chto nie zusim u temie, spytajuć: dyk a pryčym tut kuličy, śviečki i astatnija atrybuty? Vohnišča, ručai, jajki i zajcy — heta hałoŭnyja simvały śviata, jakija niasuć u sabie značeńnie śviatła, abnaŭleńnia i žyćcia. Vialikdzień — heta taksama śviata ščodrych straŭ paśla Vialikaha postu.
Zadańni na tydzień
Sprava № 1: prybracca doma
U Čysty čaćvier, pa tradycyi, navodziać paradak u chacie. Bo vialikaje śviata treba sustrakać i fizična, i duchoŭna čystymi.
Sprava № 2: nabyć pradukty
Tradycyjna śviatočny stoł składajecca ź pirahoŭ, miasnych straŭ, śviežanaciortaha chrenu i, kaniečnie, jajek-krašanak.
Nie tak daŭno my rabili hutarku ź biełaruskaj Natali Padalak, jakaja stvaryła ŭłasnuju anłajn-škołu kandytarskaha majsterstva. Prapanujem vam vydatny videa-recept piraha-paschi. Dziakujučy jamu, strava atrymajecca navat u toj haspadyni, jakaja piače ŭpieršyniu.
Sprava № 3: pamalavać jajki
Jašče z pahanskich časoŭ jajka simvalizavała trunu i zaradžeńnie novaha žyćcia adnačasova. Dla chryścijan heta napamin pra ŭvaskresieńnie Isusa Chrysta. Isnuje niekalki samych papularnych sposabaŭ zrabić sa zvyčajnaha jajka tvor mastactva.
- Varyjant dla kansiervataraŭ
Našy babuli advarvali jajki ŭ cybulniku — suchim šałupińni cybuli, jakoje źbirali za hod. Jano dazvalaje dabicca załacista-karyčnievaha koleru (čym bolš cybulniku, tym jon bolš nasyčany). Možna pajści aryhinalnym šlacham i z dapamohaj naturalnych praduktaŭ dabicca jašče i karyčnievaha (kava ci čaj), bezavaha (buraki), śvietła-zialonaha (špinat ci krapiva), žoŭty (morkva) adcieńniaŭ.
- Varyjant dla ramantykaŭ
Prymacavaŭšy da čystaha jajka liściki, kvietki, vyrazanyja z papiery fihurki, ščylna abmataŭšy jaho karunkami abo papiarednie namačyŭšy ŭ vadzie i pakačaŭšy ŭ krupach, i tolki paśla hetaha apuściŭšy ŭ kalarovy advar, vy atrymajecie vielmi pryhožyja ŭzory. U jakaści svojeasablivych trafaretaŭ možna taksama vykarystoŭvać zvyčajnyja nitki abo łapiki tkaniny.
- Varyjant dla tych, chto nie ŭmieje malavać
Kali mastak z vas tak sabie, prapanujem asvoić techniku dekupaž. Dekor jajka lohka robicca z dapamohaj papiarovych survetak z malunkami i kleju: prosta vyrazajcie ŭzory, jakija vam spadabalisia, prykładvajcie da jajka i ščodra pakryvajcie źvierchu PVA.
- Varyjant dla lanivych
U kramach užo nie pieršy tydzień pradajucca śpiecyjalnyja nalepki, farbavalniki i navat bliskaŭki z pacierkami — nabyvajem i robim pryhažość pa-chutkamu.
Sprava № 4: schadzić u carkvu
Śviatkavańnie Vialikadnia pačynajecca z udziełu ŭ vielikodnym nabaženstvie. Pravasłaŭnyja i hreka-katalickija ŭsianočnyja słužby startujuć u poŭnač, u staryja časy aśviačeńnie adbyvałasia na ich pad ranak, ale ciapier usio spraściłasia, i paśviacić stravy možna i na inšych słužbach na vychadnyja.
Darečy, na Vialikdzień tradycyjna vitajucca «Chrystos uvaskros!», a adkazvajuć «Sapraŭdy ŭvaskros!».
Ciapier čytajuć
Anžaliku Mielnikavu bačyli ŭ Minsku ŭ «Dana Mole»53
Kamientary