Pasolstva ZŠA: buduć palitviaźni, buduć novyja sankcyi ŭ dačynieńni da Biełarusi

Amerykanski bok idzie na skaračeńnie štatu pasolstva da piaci čałaviek. Pra heta paviedamiŭ na pres‑kanferencyi ŭ Miensku časovy pavierany ŭ spravach ZŠA ŭ Biełarusi Džonatan Mur.

U sieradu, 30 krasavika, a 15-j hadzinie Dž. Mur byŭ vyklikany byŭ vyklikany ŭ Ministerstva zamiežnych spraŭ. Dyplamat musiŭ pryjści sa śpisam supracoŭnikaŭ pasolstva, jakija zastajucca pracavać u Miensku.

Na pres-kanferencyi Džonatan Mur skazaŭ:

«Dla ZŠA bolš važna kolkaść palitviaźniaŭ u Biełarusi, čym kolkaść dyplamataŭ. Nia važna kolki dyplamataŭ zastajecca ŭ krainie: čatyry ci piać. Paśla pracesaŭ Kima i Parsiukieviča ŭ Biełarusi stała try palitviaźni. Pakul jość palitviaźni, jość ekanamičnyja sankcyi, ‑‑ skazaŭ Džonatan Mur.

Dyplamat nie vyklučaje mahčymaści, što ŭ vypadku admovy ŭ vyzvaleńni Kazulinu, Parsiukieviču i Kimu, amerykanski bok uviadzie novyja ekanamičnyja sankcyi ŭ dačynieńni da Biełarusi.

«Ja nia viedaju, kali heta budzie i na jakija pradpryjemstvy jany buduć nakiravanyja. Rašeńnie prymajecca ŭ Vašynhtonie, ale, dumaju, jany (sankcyi) buduć chutka. Letašnija sankcyi akazali toj efekt, jaki my čakali. U nas nikoli nie było namieru surjozna paŭpłyvać na ekanomiku Biełarusi».

Patrabavańnie skaracić pasolstva, Džonatan Mur nazvaŭ «nieapraŭdanym, nieabhruntavanym, nielehitymnym», ale pasolstva ZŠA padparadkujecca hetamu rašeńniu.

Kali zhadanyja 10 dyplamataŭ ciaham 72‑ch hadzin nie pakinuć Miensk, jany buduć abvieščanyja personami non‑hrata i vysłanyja z krainy (zaraz u Miensku znachodzicca 15 amerykanskich dyplamataŭ).

Džonatan Mur zajaviŭ, što pasolstva ZŠA pakul nie hatova dać detali, chto mienavita ciaham bližejšych 72 hadzin pakinie Miensk, a chto zastaniecca. Sam časovy pavierany ŭ spravach ZŠA ŭ Biełarusi zaznačyŭ, što zastajecca ŭ stalicy Biełarusi.

Časovy pavierany taksama paviedamiŭ, što siońnia ŭ MZS išła razmova ab viartańni ŭ Vašynhton biełaruskaha pasła Michaiła Chvastova, a ŭ Miensk — pasła ZŠA Karen Ściuart, ale takaja prapanova amerykanskaha boku była adchilenaja biełaruskim zamiežnapalityčnym viedamstvam.

Taksama Džonatan Mur spyniŭsia na dziejnaści pasolstva ZŠA ŭ Miensku ad 1991 h. Pa słovach amerykanskaha pradstaŭnika, za 17 hadoŭ Biełaruś było vydzielena 270 młn dalaraŭ humanitarnaj dapamohi, vydana 90 tys. vizaŭ, ažyćcioŭlena bolš za tysiaču prahram abmienu. Kala 300 studentaŭ atrymali mahčymaść pajechać vučycca za akijan. U prahramach, arhanizavanych amerykanskim dyppradstaŭnictvam, uziali ŭdzieł kala 600 školnikaŭ.

«Supracoŭniki ambasady abjeździli ŭsie kutki Biełarusi. Asabista ja byŭ na hetych vychodnych u Homieli i v. Morač. U vypadku skaračeńnia štatu vykonvać usiu hetuju pracu budzie našmat składaniej», -- adznačyŭ Dž. Mur.

Było zakranutaje na pres-kanferencyi i vizavaje pytańnie.

"Zaraz my akazvajem konsulskija pasłuhi tolki ŭ nadzvyčajnych vypadkach. Bolšaści hramadzianam Biełarusi my raim źviartacca ŭ naša pasolstva ŭ Maskvie", -- paviedamiŭ sp. časovy pavierany.

Džonatan Mur asabliva padkreśliŭ, što napiaredadni prezydenckich vybaraŭ u ZŠA i demakraty, i respublikancy zajmajuć adnolkavuju pazycyju adnosna biełaruskaha pytańnia: "Prynamsi adzin z troch, a to i ŭsie kandydaty dobra vałodajuć biełaruskimi prablemy".

Taksama siońnia ŭ MZS Džonatan Mur zapatrabavaŭ vyzvaleńnia advakata Emanuiła Zelcera. «Pasolstva ZŠA vykazvaje zakłapočanaść jahonym stanam zdaroŭja i patrabuje vyzvalić E. Zelcera na humanitarnych asnovach», -- skazaŭ sp. Mur.

Časovy pavierany nazvaŭ biesprecedentnym cisk, jaki akazvajecca na pasolstva ZŠA ŭ Miensku. Pavodle jahonych słovaŭ, amerykanskaja dyplamatyja jašče nikoli nie sutykałasia z padobnymi prablemami.

• 0
• 0
• 0
• 0
• 0
• 0
• 0
• 0