U Minsku prajšoŭ adzinaccaty Biełaruski tydzień mody. Biełaruskija madeljery i hości ź siami krain śvietu pradstavili svaje kalekcyi «prêt-a-porter» dy «prêt-a-porter de luxe».
«Prêt-a-porter» — vopratka, jakuju viadomyja madeljery stvarajuć dla masavaj vytvorčaści i pradajuć u kramach. Kalekcyi prêt-a-porter źjaŭlajucca asnoŭnaj krynicaj prybytku dla modnych damoŭ dy dyzajnieraŭ.
«Prêt-a-porter de luxe» — nastupny jakasny i cenavy ŭzrovień vopratki, zajmaje miesca pamiž masavymi kalekcyjami «prêt-a-porter» i vysokaj modaj «haute couture». Kalekcyi ŭ hetym styli robiacca z bolš darahich materyjałaŭ, z bolš składanym krojem i nie zaŭsiody mohuć być skarystanyja štodnia. Madeli vypuskajucca abmiežavanymi sieryjami.
Tydni mody pravodziacca dvojčy na hod, uviesnu i ŭvosień, u samych roznych haradach i krainach va ŭsim śviecie. Hałoŭnymi ličacca tydni mody ŭ haradach «vialikaj čaćviorki»: Ńju-Jorku, Łondanie, Miłanie, Paryžy. Zvyčajna svaje kalekcyi pakazvajuć «miascovyja» dyzajniery, ale heta nie žorstkaje praviła: pradstaŭniki ź inšych krain taksama mohuć brać udzieł pa zaprašeńni arhanizataraŭ. Udzieł dla dyzajnieraŭ płatny i ŭ roznych krainach maje rozny košt. Na Biełaruskim tydni mody heta 1500 dołaraŭ.
Kvitki na tydni mody tradycyjna nie pradajucca. Hości prychodziać pa zaprašeńniach arhanizataraŭ i dyzajnieraŭ. Na Biełaruski tydzień mody ŭsio ž vydzialajecca pa niekalki kvitkoŭ na kožny pakaz. Ich košt składaŭ 200—300 tysiač rubloŭ. Bolšaść ža publiki składajuć patencyjalnyja kupcy i inšyja dziełavyja partniory, žurnalisty i modnyja błohiery, viadomyja miedyja-piersony, siabry i svajaki ŭdzielnikaŭ.
Siarod haściej Biełaruskaha tydnia mody byli zaŭvažany Alena Leŭčanka, Ała Cupier, Hanna Bond, Mielicina Staniuta, Śviatłana Baroŭskaja i šmat inšych.
Najvialikšaja kancentracyja «zorak» nazirałasia padčas pakazu kalekcyi Ivana Ajpłatava, jaki zaprasiŭ u jakaści demanstrataraŭ svaich madelaŭ 10 viadomych mužčyn biełaruskaha dziaržaŭnaha telebačańnia.
Zvyčajna viasiennija tydni mody demanstrujuć modnyja nakirunki na nastupnyja vosień i zimu, a asiennija — na viasnu i leta. Hetak robicca dla taho, kab pradaŭcy adzieńnia («bajery») paśpieli vybrać i zamović toje, što jany źbirajucca prapanavać svaim pakupnikam, a vytvorcy paśpieli «adšyć» nieabchodnuju kolkaść madelaŭ.
Bajerami na Biełaruskich tydniach mody źjaŭlajucca miascovyja handlovyja arhanizacyi, a taksama śpiecyjalisty z krain Bałtyi, Rasii i Ukrainy.
Rečy z tych kalekcyj, jakija ŭdzielničajuć u Biełaruskim tydni mody, zvyčajna možna nabyć niepasredna ŭ stvaralnikaŭ, bolšaść ź ich maje svaje staronki ŭ internecie i sacyjalnych sietkach.
Časta madeljery vystaŭlajuć ich da prodažu na śpiecyjalnych vystavach kštałtu «Vialiki modny markiet» i ŭ šoŭ-rumach.
Line_A
Asnoŭny podyum adzinaccataha siezona Biełaruskaha tydnia mody pradstavili čatyrnaccać biełaruskich dyzajnieraŭ. Ich bačańnie taho, jak nam varta apranacca nastupnaj vosieńniu i zimoj, hladzicie ŭ fotach.
Marka Line_A za asnovu svaich kalekcyj biare žanockaść, elehantnaść i kłasiku. Heta adzieńnie dla ŭpeŭnienych žančyn vialikaha horada.
Leorgofman
Viadomy biełaruski brend Leorgofman zaprašaje śmiełych dziaŭčat u vandroŭku pa afrykanskaj savańnie. Dyzajnier prapanuje kłasičnyja siłuety i jarkija aplikacyi.
Boitsik
Iryna Bojcik, dyzajnierka brenda Boitsik, źviarnułasia da ciomna-sinich koleraŭ ź jarkimi akcentami. Kalekcyja pabudavana na hulni faktur tkaniny: spałučeńniach voŭny, viskozy, arhanzy, machieru.
Tarakanova
Dacentka Viciebskaha technałahičnaha ŭniviersiteta Ludmiła Tarakanava vypuskaje ŭłasnuju liniju vopratki pad brendam Tarakanova. Paśla dvuchhadovaha pierapynku dyzajnierka tryumfalna viarnułasia ŭ modu z kalekcyjaj «Revalucyja». Jana prapanuje viarnuć u mužčynski harderob sukienki dy spadnicy. Jak pryznałasia sama Ludmiła Tarakanava, u hetaj kalekcyi možna znajści vobrazy Stałypina, Krupskaj, Kieranskaha i inšych dziejačaŭ taho času.
Candy Lady
Zasnavalnik brenda Candy Lady byłaja tenisistka Volha Barabanščykava prezientavała kalekcyju «Adcieńni ščaścia». Za asnovu Volha ŭziała kalarovuju pałosku, takim čynam pakazała, što žyćcio dla jaje składajecca nie tolki z čornaha i biełaha koleraŭ.
Navy
Z brendam Navy zvyčajna pracujuć roznyja dyzajniery, ich imiony nie raskryvajucca. Viadoma, što ŭ stvareńni sioletniaj kalekcyi ŭziaŭ udzieł dyzajnier z Vjetnama. Stvaralniki imknulisia vizualizavać šum mora.
Ton-in-ton
Marka Ton-in-ton tradycyjna prapanavała biełaruskam trykatažnuju kalekcyju. Jana pryśviečanaja Minsku i minčukam.
Alona Hareckaja
Pravobrazam kalekcyi Alony Hareckaj stali dziaŭčaty 40-ch hadoŭ minułaha stahodździa. Dyzajnierka prapanuje skarystoŭvać u štodzionnych vobrazach pierje, kamieńnie, dekaratyŭnyja kvietki i ŭdała spałučaje kašemir i šoŭk.
Julija Babij
Kalekcyja dyzajnierki vopratki z architekturnaj adukacyjaj Julii Babij pryśviečana śmiełaści — śmiełaści być saboj. Madeli vyłučajucca vyraznymi siłuetnymi linijami i składanymi kolerami.
Harydavets & Efremova
Dyzajniery brenda Harydavets & Efremova prapanujuć svaje vyraby ludziam, jakija ŭpeŭnienyja ŭ sabie i staviacca da mody z peŭnaj ironijaj.
Davidova
Kalekcyja Maryny Davydavaj (brend Davidova) viartaje ŭ malenstva. Dyzajnierka źviartajecca da temy lalki i jarkich koleraŭ.
Ivan Ajpłataŭ
Ivan Ajpłataŭ stvaryŭ sa svajho pakazu sapraŭdnaje kanfieranśje-šou. Dla demanstracyi madelaŭ jon zaprasiŭ dziesiać viadomych biełaruskich viadoŭcaŭ. Kožny vobraz raspracoŭvaŭsia, sychodziačy ź indyvidualnaści i charaktaru hieroja, jaki jaho demanstruje.
Hunkemöller
Hałandski vytvorca bializny Hunkemöller, jaki aficyjna pradstaŭleny ŭ Biełarusi, taksama pakazaŭ svaju kalekcyju minskaj publicy. Brend pradstaŭlaje liniejki bializny dla roznych nahod i roznych biudžetaŭ.
Volha Kardaš
Zaviaršalnym pakazam Biełaruskaha tydnia mody stała kalekcyja Volhi Kardaš. Jak kaža aŭtarka, jaje adzieńnie ilustruje kazku, u jakoj marać žyć dziaŭčaty, jakija nie vierać u kazki.
Ciapier čytajuć
Kolki zastavałasia siadzieć departavanym palitviaźniam?8
Kamientary