Zialenski pryhraziŭ udarami pa porcie na Bałtycy, dzie zapraŭlajucca naftavyja tankiery Rasii
Prezident Ukrainy Uładzimir Zialenski zajaviŭ, što ŭkrainskija siły praciahnuć abmiežavańnie mahčymaściaŭ Rasii za košt udaraŭ pa jaje naftavaj infrastruktury.
U svaim viačernim zvarocie 14 vieraśnia kiraŭnik Ukrainy padziakavaŭ śpiecpadraździaleńniam Słužby biaśpieki Ukrainy, jakija na dniach nanieśli surjoznyja paškodžańni najbujniejšamu naftavamu terminału Rasii na Bałtyjskim mory ŭ Prymorsku. Pavodle jaho słoŭ, usio było pravierana — u vyniku ŭdaru jość adčuvalnyja straty dla praciŭnika.
Zialenski padkreśliŭ, što ŭkrainskija śpiecsłužby «trymajuć u poli zroku» taksama port Uść-Łuha ŭ Leninhradskaj vobłaści, dzie zapraŭlajucca tankiery z naftapraduktami dla ekspartu.
«Najbolš efiektyŭnyja sankcyi — heta ahoń na rasijskich naftapierapracoŭčych zavodach, na ichnich terminałach i naftaschoviščach. Sutnasna abmiežavali rasijskuju naftavuju halinu — i heta istotna abmiažoŭvaje vajnu. Rasijskaja vajna — faktyčna funkcyja nafty i hazu», — zajaviŭ prezident.
Prezident adznačyŭ, što Ukraina pastajanna pašyraje liniejku srodkaŭ paražeńnia, jakija ŭžo vyrablaje i vykarystoŭvaje.
Jon taksama padziakavaŭ ajčynnym kampanijam, što ŭdzielničajuć u stvareńni zbroi:
«Važna, što takija kampanii ŭ nas jość. Važna, što jany pavialičvajuć abjomy. My na dziaržaŭnym uzroŭni padtrymlivajem kožny taki biźnies, jaki ŭzmacniaje abaranazdolnaść i viartaje nam spraviadlivaść».
12 vieraśnia rasijskija ŭłady paviedamili pra pažar u porcie Prymorsk paśla ataki dronaŭ. Pavodle krynic «Ukrainskaj praŭdy», heta była apieracyja SBU, u vyniku jakoj paciarpieli nie tolki terminał, ale i niekalki naftapierakačvalnych stancyj, što zabiaśpiečvajuć pracu sistemy ekspartu nafty praz port Uść-Łuha.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2121
Kamientary