Ała Puhačova vysoka adazvałasia pra Džachara Dudajeva. Kadyraŭ bušuje
Kiraŭnik Čačni Ramzan Kadyraŭ nazvaŭ Ału Puhačovu voraham i zdradnikam i skazaŭ «nie pravakavać» čačencaŭ. Tak jon adreahavaŭ na intervju, u jakim śpiavačka najlepšymi słovami zhadała lidara čačenskich niezaležnikaŭ Džachara Dudajeva.
«Pra toje, jaki byŭ Dudajeŭ i jakuju karyść jon prynios, najpierš treba było b spytać samich čačencaŭ. Jaho hienieralskija ambicyi, paziorstva i naplavacielskaje staŭleńnie da sapraŭdnych prablem čačenskaha naroda pryviali da rezkaha rostu bandytyzmu i poŭnaha finansavaha zaniapadu», — zajaviŭ Kadyraŭ.
Jon skazaŭ taksama, što «takija vorahi naroda i zdradniki, jak Puhačova», nie pavinny «biazhłuzda razvažać nakont samaha ciažkaha pieryjadu dla čačenskaha naroda».
Vialikaje intervju Ały Puhačovaj žurnalistcy Kaciarynie Hardziejevaj na jutubie vyjšła 10 vieraśnia.
«Asabliva mnie zapomniłasia Pieršaja čačenskaja, tamu što ja viedała Džachara Dudajeva. Jon nastolki byŭ prystojny, intelihientny čałaviek, pryhožy čałaviek. A žonka jakaja! Mastačka, piśmieńnica, palityk… Jana telefanavała mnie, dumała, byccam ja niečym mahu dapamahčy. A čym ja mahła dapamahčy? Ničym. Mnie zaraz navat soramna joj pryviet pieradać. Ała Fiodaraŭna, kali raptam ubačycie hetaje intervju, ja prašu prabačeńnia, što nie zmahła ničoha zrabić dla taho, kab Džachar byŭ žyvy», — skazała Puhačova.
Pavodle infarmacyi rasijskich ŚMI, na Ałłu Puhačovu taksama praz słovy pra Dudajeva padadzieny pazoŭ na 1,5 miljarda rasijskich rubloŭ (kala 18 młn dalaraŭ). Inicyjataram staŭ advakat i pastajanny ŭdzielnik fiederalnych telešou Alaksandr Treščaŭ. Na hety momant sud jašče nie pryniaŭ pazoŭ da razhladu.
Džachar Dudajeŭ byŭ lidaram ruchu za niezaležnaść Čačni ŭ 1990-ch hadach i pieršym prezidentam Čačenskaj Respubliki Ičkieryja. U krasaviku 1996 hoda jon zahinuŭ u vyniku rakietnaha ŭdaru z boku Rasii.
Ałła Puhačova paśla pačatku poŭnamaštabnaha ŭvarvańnia Rasii va Ukrainu pakinuła krainu. Intervju z Hardziejevaj, dzie jana vykazałasia pra Dudajeva, stała jaje pieršaj vialikaj razmovaj z žurnalistami z pačatku vajny.
Ciapier čytajuć
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ6
Kamientary
[Zredahavana]