Kaniec fizičnych sim-kart? Novy iPhone nabližaje epochu eSim

Apple užo davoli doŭha padtrymlivaje technałohiju eSIM — i z 2022 hoda pradaje ŭ ZŠA telefony, jakija praduhledžvajuć vykarystańnie tolki elektronnych kartak.

Ale iPhone Air staŭ pieršaj pryładaj kampanii na hłabalnym rynku biez słota dla tradycyjnych SIM-kart.

Pieravaha takoha padychodu, naprykład, u tym, što karystalnikam bolš nie treba adkryvać malusieńki słot dla SIM-karty, kab pamianiać pravajdera abo płan mabilnaj suviazi.

Analityk Kiester Man z kampanii CCS Insight ličyć, što zajava Apple «aznačaje pačatak kanca fizičnaj SIM-karty».

Ale kolki času projdzie, pierš čym karystalniki zmohuć całkam admovicca ad zvykłych SIM-kart, i jak heta paŭpłyvaje na vykarystańnie telefona ŭ cełym, zastajecca pad pytańniem.

Čas raźvitvacca z łatkom dla SIM?

SIM — heta abrevijatura dla Subscriber Identity Module, heta značyć «modul identyfikacyi padpisčyka». Čyp dazvalaje padklučacca da apieratara mabilnaj suviazi i bieź jaho nielha karystacca asnoŭnymi funkcyjami telefona.

U vypadku ź jeSIM usio heta zabiaśpiečvaje mikraschiema, ubudavanaja niepasredna ŭ telefon: jaje možna pieraprahramavać pry źmienie apieratara abo jakich-niebudź funkcyj.

U apošnija hady eSIM stali alternatyvaj tradycyjnym SIM: u niekatorych telefonach možna vykarystoŭvać jak fizičnyja, tak i elektronnyja karty.

Apple pakul nie hatova całkam admovicca ad fizičnych SIM-kart, choć i inšyja jaje novyja ajfony, pradstaŭlenyja na hetym tydni (17, 17 Pro, 17 Pro Max), na niekatorych rynkach śvietu buduć padtrymlivać vyklučna eSIM. U bolšaści krain kampanija zachavaje mahčymaść vybaru tradycyjnaj płastykavaj karty.

Inšyja bujnyja vytvorcy smartfonaŭ, takija jak Samsung i Google, choć i vykarystoŭvajuć eSIM u jakaści varyjanta, u bolšaści krain pa-raniejšamu padtrymlivajuć fizičnyja SIM-karty.

Adnak u ekśpiertaŭ niama sumnievaŭ, u jakim kirunku ruchajucca vytvorcy.

Zhodna z apošnim prahnozam CCS Insight, da kanca 2024 hoda va ŭžyvańni ŭžo było 1,3 młrd smartfonaŭ z eSIM. Čakajecca, što da 2030 hoda hetaja ličba dasiahnie 3,1 miljarda. (Usiaho ŭ śviecie pracuje kala 7 młrd smartfonaŭ.)

«Z časam słot dla SIM-karty naohuł źniknie», — — skazaŭ Paoła Pieskatore.

Jakija pieravahi eSIM?

Pieskatore kaža, što pierachod na eSIM daje «šmatlikija pieravahi», najbolš vidavočnaje ź jakich — ekanomija miesca ŭnutry telefona, što dazvalaje vykarystoŭvać batarei bolšaha pamieru.

Ekśpiert taksama padkreśliŭ, što dla eSIM nie patrebien płastyk, jaki zabrudžvaje navakolnaje asiarodździe. A jašče takija karty mohuć pašyryć vybar pamiž apieratarami suviazi padčas pajezdak za miažu, što dazvalaje paźbiehnuć «šakujučych rachunkaŭ».

Kiester Man ličyć, što ŭsio heta prymusić karystalnikaŭ «pastupova źmianić sposaby ŭzajemadziejańnia sa svaimi mabilnymi apieratarami». Da prykładu, mienšaj kolkaści ludziej treba budzie iści ŭ kramu asabista, kab vyrašyć jakoje-niebudź źviazanaje z SIM-kartaj pytańnie.

Zrešty, nahadvaje Man, jak i ŭ vypadku z usimi inšymi pieramienami, jany mohuć spadabacca nie ŭsim.

«Heta novaŭviadzieńnie moža stać vialikim pytańniem dla pažyłych ludziej abo tych, chto nie nadta ŭpeŭniena adčuvaje siabie z technałohijami. Industryja pavinna zrabić usio mahčymaje, kab rastłumačyć, jak karystacca eSIM», — skazaŭ Man.

• 4
• 3
• 0
• 1
• 1
• 1
• 0
• 0