U Pinsku aryštavali troch udzielnikaŭ kazackaha konnaha pachodu Maskva — Bierlin
Traich udzielnikaŭ konnaha pachodu Maskva — Bierlin zatrymała biełaruskaja milicyja. Dvoje sutak rasiejcy praviali ŭ izalatary časovaha ŭtrymańnia Pinskaha HAUS ŭ statusie padazravanych, a na trecija, 10 lipienia, Pinski mižrajonny adździeł Śledčaha kamiteta pradjaviŭ ŭsim trom aficyjnaje abvinavačvańnie ŭ złosnym chulihanstvie (č. 2 art. 339 KK RB).
Pinskaja mižrajonnaja prakuratura sankcyjanavała ich aryšt terminam na dva miesiacy na pieryjad papiaredniaha rasśledavańnia.
«Troje hramadzian Rasii, adzin ź ich niepaŭnahadovy, u noč z aŭtorka na sieradu, budučy ŭ niećviarozym stanie, źbili maładoha čałavieka, jaki pražyvaje ŭ internacie Pinskaha ahrarna-technałahičnaha kaledža ŭ vioscy Haleva, paškodzili chaładzilnik, uvachodnyja dźviery, raźbili šklanuju vazu», — raspavioŭ namieśnik Pinskaha mižrajonnaha prakurora Siarhiej Haroška.
Pavodle jaho słoŭ, miascovyja ŭłady dali ŭdzielnikam konnaha pachodu dla pražyvańnia ceły pavierch u internacie vyšejnazvanaha kaledža. Paciarpieły pražyvaje na inšym paviersie. Pryjezdžyja zajavilisia da jaho ŭ pakoj i źbili. Padstavaj dla kanfliktu nibyta pasłužyła jaho siabroŭstva ź dziaŭčynaj, ź jakoj u dzień svajho zasialeńnia ŭ internat paznajomilisia i rasijanie. Ich, jak na hrech, paśla pakazalnych vystupleńniaŭ pa džyhitoŭcy ładna pačastavali na pryrodzie śpirtnym ziemlaki ź Pinska.
Vyniesienaja ŭ dačynieńni da zatrymanych miera strymańnia ŭ vyhladzie aryštu strohaja, ale ŭ dadzienaj situacyi vybar u śledstva nievialiki, arhumientuje Siarhiej Haroška pazicyju prakuratury. U 17-hadovaha rasijanina niama ŭ Pinsku svajakoŭ, na apieku jakich možna było b pakinuć jaho na pieryjad papiaredniaha rasśledavańnia kryminalnaj spravy. Što tyčycca jaho starejšych tavaryšaŭ, vyzvaleńnie jakich z-pad varty tearetyčna mahčyma pry uniasieńni hrašovaha zakładu i piśmovaha abaviazacielstva źjaŭlacca da śledčaha na dopyt pa pieršym patrabavańni, to takoje chadajnictva ni imi, ni ich advakatami na momant vyniasieńnia pastanovy ab aryšcie nie zajaŭlałasia.
Častka 2 artykuła 339 KK RB praduhledžvaje pakarańnie ŭ vyhladzie aryštu, abmiežavańnia albo pazbaŭleńnia voli. Stupień viny i mieru adkaznaści vyznačaje sud. Zrešty, raźviazka ŭ hetaj historyi moža być inšaja. Zakon praduhledžvaje vyzvaleńnie ad kryminalnaj adkaznaści za mienš ciažkaje złačynstva pry poŭnym pryznańni viny i kampiensacyi naniesienaj škody. Što datyčycca druhoj abaviazkovaj umovy, to kiraŭnictva pachodu ciapier jak raz i zajmajecca jaho vykanańniem.
Arhanizatary pachodu i jaho ŭdzielniki asudzili pravinu svaich aryštavanych tavaryšaŭ. Abvinavačanaja ŭ złosnym chulihanstvie trojca zavočna ŭžo pazbaŭlenaja ŭsich uznaharod, atrymanych u chodzie ekśpiedycyi, jakaja doŭžyłasia 40 sutak. Pachod dla ich zavieršycca ŭ Pinsku. Ich kalehi nastrojenyja jašče pabyvać u Breście i Bresckaj krepaści, paśla čaho aŭtobusam pierasiekčy biełaruska-polskuju miažu i adpravicca ŭ kančatkovy punkt pryznačeńnia — stalicu Hiermanii Bierlin.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam5
Kamientary