«Ciahnik na Jumu» i «Ilvy dla jahniatak»

CIAHNIK NA JUMU (3:10 to Yuma)
ZŠA, 2007, kalarovy, 117 chv.
Režyser: Džejmz Menhałd
Roli vykonvajuć: Raseł Kroŭ, Kryścijan Bejł, Łohan Lermen, Dałas Roberts, Piter Fonda, Ben Foster, Vajnesa Šo
Žanr: Vestern
Adznaka: 8 (z 10)

Były invalid amerykanskaj armii, a ciapier źbiadnieły fermer Den Evans zhadžajecca za hrošy dastavić aryštavanaha kiraŭnika bandy Bena Ŭejda da ciahnika. Ale złačyncy nie źbirajucca hublać svajho pavadyra…

Novy vestern, pastaŭleny pavodle filmu 1957 hodu Dełmera Dejvisa j naveli Ełmera Leanarda – daje novaje dychańnie padzabytamu j pašanoŭnamu žanru.

Na pylnych prastorach Dzikaha Zachadu iznoŭ ustaloŭvajecca spraviadlivaść, a hieroj adnaŭlaje zakon, kali ŭsio – i ŭsie – suprać jaho.

Akcent u karcinie Džejmza Menhalda – psychalahičny dvuboj, tajny dušy, suvoryja mužčynskija razborki sa spoviedziami, abvostrany kanflikt dabra j zła. Charyzmatyčny niahodnik Ben Ŭejd u nieachajna-zhrabnym vykanańni Raseła Kroŭ amal na praciahu ŭsiaje stužki – djabał-spakušalnik (jaki vydatna viedaje Bibliju, a ŭ volny ad zabojstvaŭ čas niabłaha maluje). Spakutavany, schudnieły Kryścijan Bejł u roli Dena Evansa nia musiŭ hierojem być – ale stajecca im i daje prykład svajmu ŭtrapionamu synu (Łohan Lermen).

Uvohule, aktorskaja hulnia ŭ filmy – udumlivaja, hruntoŭnaja, pašanoŭnaja – staroj škoły, jakaja nie pierajmajecca kamputarnymi stralałkami. Nielha zabyć i klasyka Pitera Fondu – źjedlivaha detektyva, i niastrymanaha Bena Fostera – psychapata-złačynca.

Abaviazkovyja dla vesterna pierastrełki addadzienyja ŭ filmie persanažam admoŭnym – što tolki pavyšaje hradus psychalahičnaha šoku i harantuje ačyščalny finał.

Surjozny prykład hodnaha kino – i novy krok staroha žanru.

ILVY DLA JAHNIATAŬ (Lions for Lambs)
ZŠA, 2007, kalarovy, 88 chv.
Režyser: Robert Redfard
Roli vykonvajuć: Robert Redfard, Merył Stryp, Tom Kruz, Majkł Pieńja, Endru Harfiłd, Piter Berh
Žanr: Sacyjalna-palityčnaja drama
Adznaka: 6 (z 10)

U toj čas, jak vykładčyk palitalohii sprabuje zaachvocić lepšaha studenta da hramadzkaj dziejnaści, ambitny palityk apraŭdvaje novuju aperacyju ŭ Aŭhanistanie, a byłyja vučni prafesara hinuć na aŭhanskim płato…

Stužka amerykanskaha aktora Roberta Redfarda (jaki vykanaŭ hałoŭnuju rolu) daśleduje kapitulacyju žurnalistaŭ pierad industryjaj zabavaŭ, papaŭtornaść militaryskaj rytoryki – i čałaviečuju abyjakavaść, jak korań hramadzkaha zła.

Karcina Redfarda – hruntoŭnaja, sacyjalnaja (u lepšych tradycyjach krytyčnaha realizmu) i zusim nie mejnstrymnaja. Aktory – sam Redfard i Tom Kruz dakładna malujuć varahoŭnyja hramadzka-palityčnyja typy. A Merył Stryp, u roli žurnalistki, jašče j dazvalaje daścipnuju ironiju da svajoj papiaredniaj “ściarvoznaj” hlamurnicy z “Djabła, što nosić “Prada””.

Ale hetaja palityka-psychalahičnaja stužka budzie cikavaja najpierš amerykancam – dyj toje, nia ŭsim. Chacia ŭ rasiejskim varyjancie karciny amal usie amerykanskija dakumenty ŭ kadry… na ruskaj movie.

Kinaterminy

Kinapadziei

Usie filmy

Kinatvorcy

• 0
• 0
• 0
• 0
• 0
• 0
• 0
• 0