Карціна «Солт» з Анджалінай Джолі ў ролі агенткі з’явілася акурат падчас шпегаўскага скандалу.
ЗША, 2010, каляровы, 100 хв.
Рэжысёр: Філіп Нойс
Ролі выконваюць: Анджаліна Джолі, Ліў Шрайбер, Чыўэтэл Эджыафор, Даніэль Альбрыхскі, Аўгуст Дзіль
Жанр: Шпегаўскі трылер, баявік
Адзнака: 6 (з 10)
Эвелін Солт — супрацоўніца ЦРУ, якой давяраюць. Але схоплены рускі агент заяўляе, што Солт — заканспіраваны крот. І задача Солт — забіць рускага прэзідэнта, які гасцюе ў Амерыцы. Адлік пайшоў.
Карціна Філіпа Нойса з Анджалінай Джолі ў ролі агенткі з’явілася акурат падчас шпегаўскага скандалу, калі ў ЗША была выкрытая расейская сетка кратоў-аматараў. Фігурантку скандалу Ганну Чэпмэн нават запрашалі на прэм’еру фільму ў Маскву скласці кампаніі Анджаліне. Шпегаўка не прыехала.
Затое ў нас ёсць магчымасць ацаніць кінажарсці, знятыя ў смачных традыцыях халоднай вайны. Акрабатычныя бойкі, скачкі на машынах, трылерныя крыкі «мяне падставілі» — добра вядомыя гледачу.
Затое прыгажуня-актрыса, якая ветліва раскідывае гранаты; футравая шапка на Анджаліне — новыя незабыўныя кадры.Бюсцік Леніна, пярсцёнак з пяціканцоваю зорачкай (для пацалунку), лязо ў пантофлях Даніэля Альбрыхскага — кінапрыемнасці ад старых ворагаў.
І ўсё гэта — у шальным тэмпе высокабюджэтнага трылеру, дзе абавязкова выратоўваюць цэлы свет.
Якія расейскія агенты-аматары? Забудзьце, у фантазійным Галівудзе стаўкі праўдзівейшыя.
Дарэчы, колішняя жонка Філіпа Нойса — таксама Чэпмэн.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію97
Каментары