На сустрэчы беларусаў Паўночнай Амерыкі заклікалі стварыць Сусветны беларускі кангрэс
5—7 верасня ў Нью-Ёрку прайшла 36‑я Сустрэча беларусаў Паўночнай Амерыкі — найстарэйшы рэгулярны форум беларускай дыяспары ЗША і Канады, што ладзіцца раз на два гады.
Як паведаміў Свабодзе ўдзельнік падзеі Алесь Кот, 36‑я Сустрэча беларусаў Паўночнай Амерыкі выступіла з ініцыятывай распачаць працу над стварэннем Сусветнага беларускага кангрэсу. На форуме таксама абмеркавалі міжнародную супрацу беларускай дыяспары, беларускую прысутнасць у сучаснай інфармацыйнай прасторы.
«Падзеі ў Беларусі і свеце, пагрозы беларускай дзяржаўнасці, новая хваля эміграцыі і значнае пашырэнне беларускай прысутнасці ў розных краінах паставілі перад удзельнікамі пытанне не толькі пра захаванне традыцыйных асяродкаў, але і пра новыя формы супольнага дзеяння і адказнасці за будучыню Беларусі», — паведаміў удзельнік форуму Алесь Кот.
Гаворка ішла пра кансалідацыю беларускай дыяспары і стварэнне сталага механізму сувязі паміж беларускімі арганізацыямі розных краін. Удзельнікі прыйшлі да высновы: сусветная беларуская супольнасць мае значны чалавечы, прафесійны і арганізацыйны патэнцыял, аднак рэгулярныя сувязі і абмен інфармацыяй паміж яе асяродкамі застаюцца недастатковымі.
Удзельнікі сустрэчы палічылі мэтазгодным вынесці ідэю Сусветнага беларускага кангрэсу на больш шырокае абмеркаванне.
Гэтая думка знайшла адлюстраванне ў рэзалюцыі 36‑й Сустрэчы, у якой адзначана, што «ва ўмовах, калі мільёны беларусаў пазбаўленыя магчымасці свабодна ўдзельнічаць у грамадскім і палітычным жыцці сваёй краіны, асаблівую вагу мае беларуская дыяспара як неад'емная частка беларускай нацыі».
Ад імя ўдзельнікаў 36‑й Сустрэчы беларусаў Паўночнай Амерыкі прагучаў заклік: «Дзе б мы ні жылі, мы застаемся адной Беларускай Нацыяй. Ніводная беларуская супольнасць на чужыне ніколі не можа стаць заменай Беларусі. Наша Бацькаўшчына — у Беларусі».
Адным з інструментаў беларускага яднання прапануецца зрабіць Сусветны беларускі кангрэс.
Мадэль, структура, паўнамоцтвы і прынцыпы прадстаўніцтва кангрэсу пакуль не вызначаныя. Гэтыя пытанні прапануецца вынесці на шырокае абмеркаванне беларускай дыяспары.
Цяпер чытаюць
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе13
Каментары