Жыхары Слуцка і Слуцкага раёна зноў б'юць трывогу з-за нашэсця буйных смаўжоў, якія знішчаюць пасадкі на ўчастках.
Паводле слоў агароднікаў, шкоднікі з кожным годам займаюць усё новыя тэрыторыі. Мяркуюць, што гэта іспанскі смоўж, але пакуль дакладных звестак, што гэта менавіта ён, няма.
Як піша SlutskGorod, буйных смаўжоў ужо некалькі гадоў заўважаюць у розных раёнах Слуцка — у раёне Цыганскага парку, а таксама на вуліцах Розы Люксембург і Пліева. Паводле расповедаў жыхароў, на адным баку вуліцы Пліева з імі змагаюцца каля пяці гадоў, на другім — прыкладна два гады.
Агароднікі расказваюць, што яны хутка распаўсюджваюцца на суседнія ўчасткі і сур'ёзна пашкоджваюць расліны. У перыяд масавага з'яўлення, паводле іх слоў, за адзін абход участка ўдаецца сабраць да чатырох-пяці літраў шкоднікаў.
Хоць спецыялісты пакуль не пацвердзілі, што выяўленыя асобіны належаць менавіта да іспанскага смаўжа, асцярогі маюць падставы. Гэты інвазійны від лічыцца адным з самых небяспечных шкоднікаў садоў і агародаў.
Паводле слоў жыхароў Слуцка, цалкам пазбавіцца ад шкоднікаў пакуль не ўдаецца. Для барацьбы выкарыстоўваюць розныя сродкі, у тым ліку склады на аснове солі. Аднак самі дачнікі адзначаюць, што такія метады могуць нашкодзіць глебе.
Адзін з суразмоўцаў выдання расказаў, што пасля рэгулярнай апрацоўкі падобным сродкам на ўчастку перасталі расці клубніцы.
Пра смаўжоў і слімакоў б'юць трывогу сяляне і агароднікі ў розных часцінах Беларусі. Смаўжы і слімакі сталі для іх сапраўдным бедствам.
Цяпер чытаюць
Колькі беларусаў атрымалі польскае грамадзянства за апошні час. Лічбы ўражваюць36
Каментары