Дом, з якога расійскія гастралёры спрабавалі скрасці мільёны даляраў, належыць былому выканаўчаму дырэктару Беларусбанка
У мінскіх Навінках са стралянінай затрымалі злачынцаў, якія спадзяваліся скрасці з прыватнага катэджа ад 1,5 да 5 мільёна даляраў. «Белсат» высветліў па кадрах МУС, пра які дом вядзецца гаворка, а Belpol расказаў, хто жыве ў гэтым доме.
Міністэрства ўнутраных спраў Беларусі паведаміла пра затрыманне са стралянінай групы злодзеяў, якія 27 ліпеня спрабавалі абакрасці катэдж у Цэнтральным раёне Мінску.
Адзін з затрыманых сказаў на відэа Міністэрства ўнутраных спраў, што скрасці збіраліся ад 1,5 да 5 мільёна даляраў.
Дзе менавіта гэта адбылося, не паведамлялі. Але на кадрах сілавікоў відаць шпіль скандальнага Свята-Елізавецінскага манастыра і будынкі на вуліцы Ярашэвіцкай у раёне Навінкі. З кадраў сілавікоў можна вызначыць канкрэтны дом.
Пра аперацыю распавёў Уладзімір Кубракоў — намеснік начальніка Цэнтральнага РУУС Мінску, сын міністра ўнутраных спраў Івана Кубракова. Ён стаіць на фоне будынка з пазнавальнымі рысамі.
Фон за ягонай спінай размыты, але вуліцу і нумар дома магчыма прачытаць. Паказвалі таксама электронны замок і плот дома — на панараме «Яндэкс Картаў» бачна, што такі замок на тым самым доме за спінай сына міністра. Паказалі і гараж таго дома, у якім стаіць шэры BMW.
Будынкі на гэтай вуліцы не фігуравалі ў расследаваннях аб карупцыі і нерухомасці чыноўнікаў. «Белсат» спытаў арганізацыю Belpol, хто жыве ў доме.
Паводле звестак, дасяжных Belpol, у доме зарэгістраваныя пяць чалавек з аднолькавым прозвішчам: дарослыя Уладзімір і Юлія Мяцельскія, а таксама тры хлопцы — імаверна, іхныя дзеці (два па бацьку Уладзіміравічы, у старэйшага 19‑гадовага імя па бацьку не супадае з імем па бацьку іншых дзяцей і самога Уладзіміра).
50‑гадовы Уладзімір Мяцельскі прынамсі з 2016 года працаваў у Беларусбанку выканаўчым дырэктарам, выступаў у медыя ад імя банку. На момант публікацыі ён не значыцца ў ліку кіраўніцтва банку.
Затое ў расійскай банкаўскай сістэме з'явіўся Уладзімір Мяцельскі — дырэктар дэпартамента развіцця бізнэсу з міжнароднымі кліентамі Промсвязьбанка, адказны за Беларусь і Узбекістан.
40‑гадовая Юлія Мяцельская да 2019 года працавала ў ТАА «Эмерсіс Трэйд», пасля значыцца беспрацоўнай.
Чаму ў сейфе гэтага дома спадзяваліся знайсці мільёны даляраў, невядома.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу7
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары
Спокойная жизнь минских чиновников - миллионеров закончилась навсегда.