Труну з целам аяталы Хаменеі перавезлі з Ірана ў Ірак. З ім развітваюцца мясцовыя шыіты
Труну з целам аяталы Алі Хаменеі перавезлі ў Ірак, дзе прайшлі жалобныя мерапрыемствы з удзелам тысяч людзей. Пасля некалькіх дзён развітання ў Іране труна былога вярхоўнага лідара краіны была дастаўлена ў Наджаф. У мясцовым аэрапорце яе сустрэлі прадстаўнікі іракскіх уладаў і шыіцкія рэлігійныя дзеячы. На цырымонію ў суседнюю краіну прыехаў і прэзідэнт Ірана Масуд Пезешкіян, піша Reuters.
Падчас жалобнай працэсіі аўтамабіль з труной праехаў па вуліцах горада Наджаф, дзе сабраліся вялікія натоўпы людзей. Удзельнікі трымалі партрэты Хаменеі, дзяржаўныя сцягі Ірана і Ірака, а таксама сцягі праіранскіх узброеных фарміраванняў. Частка прысутных скандавала антыамерыканскія і антыізраільскія лозунгі.
Пасля Наджафа працэсія павінна накіравацца ў горад Кербела, а затым труну вернуць у Іран. Пахаванне запланавана ў Мешхедзе 9 ліпеня.
Жалобная цырымонія ў Іране пачалася 4 ліпеня. Раней паведамлялася, што развітацца з Хаменеі прыйшлі сотні тысяч людзей.
Алі Хаменеі ўзначальваў Іран на працягу 37 гадоў і загінуў 28 лютага ў першы дзень вайны паміж Іранам і амерыкана-ізраільскімі сіламі.
Мусульмане-шыіты складаюць каля 60-65% насельніцтва Ірака. Гэта дэмаграфічная большасць краіны, і менавіта ў Іраку знаходзяцца галоўныя шыіцкія святыні свету — гарады Наджаф і Кербела.
Пасля зрынання суніцкага рэжыму Садама Хусейна ў 2003 годзе шыіты прыйшлі да ўлады ў Багдадзе, што цалкам змяніла карту рэгіянальнага ўплыву і адкрыла дзверы для цеснага збліжэння гэтай краіны з шыіцкім Іранам.
Частка іракскага грамадства ставілася да аяталы Хаменеі з глыбокай павагай. Ён з'яўляўся для гэтых людзей рэлігійным аўтарытэтам вышэйшага рангу (марджа ат-таклід). Значная доля вернікаў у Іраку свядома выбірае яго ў якасці свайго духоўнага кіраўніка.
Новы вярхоўны лідар Ірана Маджтаба Хаменеі не з’явіўся на пахаванне свайго забітага бацькі
У Тэгеране праходзіць развітанне з Алі Хаменеі: Мядзведзеў пагражае блакадай праліваў, а новы лідар Ірана хаваецца ў бункеры
Ігар Сергеенка прыляцеў у Іран на пахаванне аяталы Хаменеі
Пахаванне Алі Хаменеі адбудзецца 9 ліпеня
Дзе працуюць і як выглядаюць жонкі топ-чыноўнікаў?16
Дзе працуюць і як выглядаюць жонкі топ-чыноўнікаў?
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1111
Каментары