За бел-чырвона-белы сцяг на Грунвальдскім полі сабралі 841 подпіс
У ідэале арганізатары петыцыі за бел-чырвона-белы сцяг на Грунвальдскім полі хацелі б сабраць 12 тысяч подпісаў. Столькі воінаў з беларускіх тэрыторый удзельнічалі ў бітве, піша Радыё Свабода.
Петыцыя з просьбай усталяваць на Грунвальдскім полі флагшток з бел-чырвона-белым сцягам за тыдзень сабрала 823 подпісы. Сярод вядомых падпісантаў — Алесь Лагвінец, Юры Губарэвіч, Анатоль Лябедзька, Віталь Рымашэўскі, Ігар Барысаў.
В.а. старшыні Партыі БНФ Юры Меляшкевіч, які пазначаны як ініцыятар петыцыі, расказаў Свабодзе, што ідэя кампаніі належала Алесю Лагвінцу, які першым звярнуў увагу на адсутнасць бел-чырвона-белага сцяга на Грунвальдскім полі на сталай аснове.
«Музейная прастора Грунвальдскага поля развіваецца. Там спачатку прысутнічалі сцягі Польшчы, пасля Літвы. У нейкі момант дадаўся сцяг Украіны. Для завяршэння контуру дзяржаўных суб’ектаў, якія беспасярэдне ўдзельнічалі ў перамозе, вядома, беларускі сцяг павінен там быць», — каментуе суразмоўца.
Са словаў Меляшкевіча, у першы дзень збор подпісаў ішоў добра, бо людзі дзяліліся ім у сацыяльных сетках. Аднак ужо на другі дзень Facebook забараніў распаўсюджваць гэтую петыцыю, і збор запаволіўся.
«Мне даслалі інфармацыйны допіс, што я нейкім чынам парушыў палітыку Facebook — штосьці звязанае са спамам ці зборам прыватнай інфармацыі. І Facebook выдаліў спасылкі, расшараныя ў сацыяльных сетках. Некаторыя людзі нават пацярпелі, ім часткова абмежавалі функцыянал Facebook», — расказвае Юры.
Ініцыятары петыцыі хацелі б сабраць 10—12 тысяч подпісаў да 15 ліпеня, калі будзе адзначацца 616‑я гадавіна Грунвальдскай бітвы.
«Дванаццаць тысяч — гэта сімвалічная лічба, бо яна адпавядае той колькасці воінаў, якія, з пункту гледжання цяперашняй навукі, з тэрыторыі Беларусі ўдзельнічалі ў славутай бітве», — тлумачыць Меляшкевіч.
Юры кажа, што цяпер збор подпісаў запаволіўся. Таму ён хоча правесці грамадскую кампанію за нацыянальны сцяг на Грунвальдскім полі з дапамогай палітычных і грамадскіх арганізацый і дзеячаў. Разлічвае таксама на пашырэнне петыцыі ў Telegram, на іншых дасяжных сацыяльных каналах і ў медыя.
«Мы звярнуліся да нашых польскіх партнёраў, у тым ліку дзякуючы Анатолю Лябедзьку, які гэтае пытанне падымаў у Бруселі», — паведаміў суразмоўца.
Рашэнне аб мачце з бел-чырвона-белым сцягам на месцы падзеі павінна прыняць кіраўніцтва музея бітвы пад Грунвальдам.
«Думаю, што тут можа быць залучаная адміністрацыя адпаведнай гміны, павета, а нават і ваяводства», — дадае Юры.
Перамовы наўпрост з музеем плануюць весці, калі збярэцца прынамсі 1—2 тысячы подпісаў.
«Я спадзяюся на разуменне. У нас даволі даўняя гісторыя адносінаў з польскімі культурніцкімі ініцыятывамі, установамі. Я спакойна стаўлюся да гэтых перамоваў і пазітыўна гляджу наперад», — кажа Меляшкевіч.
Цяпер чытаюць
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка2
Каментары
Пашырым допіс