У Грузіі адкрылі склеп са сталінскімі вінамі. Іх прададуць з аўкцыёна
У Тбілісі ўпершыню за доўгі час адкрылі вінны склеп, дзе захоўваецца вялікая калекцыя вінаў, якая калісьці належала Іосіфу Сталіну. У паўзмроку памяшкання, дзе са столі звісае павуцінне, адчуваецца лёгкі саладкавата-мускусны пах. Тут знаходзіцца каля 40 тысяч бутэлек рэдкіх вінаў з Францыі і Грузіі, піша Reuters.
Грузінскія ўлады, якім цяпер належыць гэтая калекцыя, вырашылі раскрыць сховішча і паказаць яго публіцы. Частку вінаў, некаторыя з якіх датуюцца пачаткам XIX стагоддзя, плануюць выставіць на аўкцыён. Атрыманыя сродкі мяркуецца накіраваць на стварэнне школы вінаробства ў Грузіі.
Прадстаўнікі праекта адзначаюць, што гэты аўкцыён можа прыцягнуць увагу калекцыянераў з усяго свету і павысіць статус Грузіі як краіны з багатай вінаробнай спадчынай. Краіна і так пазіцыянуе сябе як адно з найстаражытнейшых месцаў паходжання віна — археалагічныя знаходкі сведчаць пра бесперапынную традыцыю вінаробства на працягу каля 8 тысяч гадоў.
У зборы Сталіна ёсць напоі з вядомых вінных гаспадарак Бардо, якія раней належалі расійскім імператарам Аляксандру III і Мікалаю II. Пасля рэвалюцыі 1917 года савецкая ўлада канфіскавала імператарскую калекцыю, а пазней яна апынулася ў распараджэнні савецкага дыктатара, які папаўняў яе грузінскімі вінамі, што яму падабаліся.
Адзін з калекцыянераў, які прыехаў у Тбілісі з ЗША, адзначыў, што агляд гэтых бутэлек выклікае адчуванне, нібы адкрываеш старажытную таямніцу. Ён параўнаў гэта з прыгодамі археолага, калі невядома, знойдзеш ты нешта звычайнае ці сапраўдную гістарычную каштоўнасць. Паводле яго слоў, такія моманты, калі можна дакрануцца да жывой гісторыі, сёння здараюцца вельмі рэдка.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары
дык вось там бюсты сталіна ад маленькіх да ў чалавечы рост прадаюцца ледзь не ў кожнай сувенірнай лаўцы, а ў Горы (радзіма сталіна), - казаў таксіст, - першы тост за сталіна