U Hruzii adkryli sklep sa stalinskimi vinami. Ich pradaduć z aŭkcyjona
U Tbilisi ŭpieršyniu za doŭhi čas adkryli vinny sklep, dzie zachoŭvajecca vialikaja kalekcyja vinaŭ, jakaja kaliści naležała Iosifu Stalinu. U paŭzmroku pamiaškańnia, dzie sa stoli źvisaje pavucińnie, adčuvajecca lohki saładkavata-muskusny pach. Tut znachodzicca kala 40 tysiač butelek redkich vinaŭ z Francyi i Hruzii, piša Reuters.
Hruzinskija ŭłady, jakim ciapier naležyć hetaja kalekcyja, vyrašyli raskryć schovišča i pakazać jaho publicy. Častku vinaŭ, niekatoryja ź jakich datujucca pačatkam XIX stahodździa, płanujuć vystavić na aŭkcyjon. Atrymanyja srodki miarkujecca nakiravać na stvareńnie škoły vinarobstva ŭ Hruzii.
Pradstaŭniki prajekta adznačajuć, što hety aŭkcyjon moža pryciahnuć uvahu kalekcyjanieraŭ z usiaho śvietu i pavysić status Hruzii jak krainy z bahataj vinarobnaj spadčynaj. Kraina i tak pazicyjanuje siabie jak adno z najstaražytniejšych miescaŭ pachodžańnia vina — archieałahičnyja znachodki śviedčać pra bieśpierapynnuju tradycyju vinarobstva na praciahu kala 8 tysiač hadoŭ.
U zbory Stalina jość napoi ź viadomych vinnych haspadarak Bardo, jakija raniej naležali rasijskim impierataram Alaksandru III i Mikałaju II. Paśla revalucyi 1917 hoda savieckaja ŭłada kanfiskavała impieratarskuju kalekcyju, a paźniej jana apynułasia ŭ rasparadžeńni savieckaha dyktatara, jaki papaŭniaŭ jaje hruzinskimi vinami, što jamu padabalisia.
Adzin z kalekcyjanieraŭ, jaki pryjechaŭ u Tbilisi z ZŠA, adznačyŭ, što ahlad hetych butelek vyklikaje adčuvańnie, niby adkryvaješ staražytnuju tajamnicu. Jon paraŭnaŭ heta z pryhodami archieołaha, kali nieviadoma, znojdzieš ty niešta zvyčajnaje ci sapraŭdnuju histaryčnuju kaštoŭnaść. Pavodle jaho słoŭ, takija momanty, kali možna dakranucca da žyvoj historyi, siońnia zdarajucca vielmi redka.
Kamientary
dyk voś tam biusty stalina ad maleńkich da ŭ čałaviečy rost pradajucca ledź nie ŭ kožnaj suvienirnaj łaŭcy, a ŭ Hory (radzima stalina), - kazaŭ taksist, - pieršy tost za stalina
i... (vybačajusia) trochi na hetym čarhovy raz padzarabić?
a jak heta ŭsio apynułasia ŭ sklepach uvažajemoho tovariŝa (nie) hruzina?