Дзяржаўныя СМІ паведамілі пра аднаўленне чыгуначнага злучэння з Польшчай. Ці праўда?
Першы інфармацыйны 6 лютага паведаміў, што з 1 красавіка Польшча плануе аднавіць чыгуначнае злучэнне з Беларуссю. «Белсат» запытаўся ў польскай чыгункі, ці праўда гэта.
Паводле Першага інфармацыйнага, «польскія ўлады плануюць далейшае паэтапнае адкрыццё мяжы з Беларуссю. Мясцовыя медыя паведамляюць пра аднаўленне чыгуначнага злучэння паміж краінамі з 1 красавіка, якое адбудзецца неўзабаве».
Якія менавіта польскія медыі пра гэта паведамілі, у матэрыяле не ўдакладняецца. Ніякіх спасылак таксама няма.
Навіна пра аднаўленне чыгуначнага руху 5 лютага з’явілася і ў тэлеграм-канале Infotrans Media Belarus. У ёй больш дэталяў, аднак таксама без спасылак на польскія выданні:
«Чыгуначнае злучэнне паміж Польшчай і Беларуссю могуць адкрыць ужо з 1 красавіка. Пытанне пра адкрыццё пасажырскага чыгуначнага злучэння паміж Беларуссю і Польшчай насамрэч прапрацоўваецца. Тэма актыўна абмяркоўваецца апошнім часам. Яна падымалася на пасяджэнні гарадской рады Белая Падляская, а ў памежны Тарэспаль нядаўна прыязджала дэлегацыя Беларускай чыгункі. Бакі абмяркоўваюць магчымасць аднаўлення пасажырскага чыгуначнага руху ўжо з 1 красавіка».
Польская чыгунка (PKP Polskie Linie Kolejowe S.A) у адказ на запыт «Белсату» зняпраўдзіла гэтую інфармацыю.
«У Польскія чыгуначныя лініі не паступала ніводнага звароту ці запыту з боку перавознікаў. У звязку з гэтым аднаўленне чыгуначнага злучэння з Беларуссю з 1 красавіка не плануецца», — гаворыцца ў паведамленні прэс-службы Польскай чыгункі.
Пасажырскі чыгуначны рух паміж Польшчай і Беларуссю спыніўся ў сакавіку 2020 года. Спачатку гэта было выклікана пандэміяй каранавіруса. Пазней рух так і не аднавіўся праз санкцыі.
Цяпер чытаюць
Маўрыкій, Сейшэлы, Шры-Ланка і не толькі: паглядзелі, куды збеглі ад беларускіх маразоў праўладныя артысты і вядучыя6
Каментары