Зборная Сенегала стала чэмпіёнам Афрыкі па футболе, перамогшы ў скандальным фінале
Зборная Сенегала ў скандальным фінале перамагла зборную Марока і стала чэмпіёнам Афрыкі па футболе. Фінальны матч Кубка афрыканскіх нацый прайшоў у мараканскім Рабаце. У дадатковы час сенегальцы здолелі абыграць гаспадароў турніру з лікам 1:0, адзіны гол на 94‑й хвіліне забіў Пап Гее.
Асноўны час сустрэчы завяршыўся гучным скандалам. На восьмай дададзенай хвіліне арбітр прызначыў пенальці ў вароты Сенегала, пасля чаго галоўны трэнер каманды, не згодны з гэтым рашэннем, распарадзіўся вывесці футбалістаў з поля. Гэта выклікала беспарадкі на трыбунах: частка сенегальскіх заўзятараў выбегла да поля і ўступіла ў сутычкі з аховай.
Сітуацыю ўдалося супакоіць дзякуючы лідару зборнай Сенегала Садыё Манэ, які ўгаварыў каманду вярнуцца ў гульню. Аднак мараканец Браім Дыяс, які выступае за мадрыдскі «Рэал», пасля таго не змог рэалізаваць той самы злашчасны пенальці, паспрабаваўшы прабіць у стылі «паненка». Сенегальцы ж пасля свой шанец выкарысталі.
Для Сенегала гэта ўжо другая перамога ў гісторыі Кубка афрыканскіх нацый — раней каманда брала тытул у 2021 годзе. Марока ж, нягледзячы на хатні стадыён, другі раз у сваёй гісторыі саступіла ў фінале.
Прэзідэнт Сенегала Басіру Дыямай Фай абвясціў 19 студзеня аплатным выхадным днём па ўсёй краіне ў гонар чэмпіёнства.
Найлепшы гулец турніру Садыё Манэ пасля фіналу паведаміў, што плануе завяршыць кар’еру ў нацыянальнай зборнай. 33‑гадовы форвард правёў за каманду Сенегала 124 матчы і забіў 52 галы. На клубным узроўні ён найбольш вядомы па выступленнях за англійскі «Ліверпуль», дзе ў 269 матчах забіў 120 мячоў. Цяпер Манэ выступае за саудаўскі «Аль-Наср».
У той жа час Федэрацыя футбола Марока звернецца ў ФІФА і Афрыканскую канфедэрацыю футбола з-за сыходу зборнай Сенегала з поля ў фінале, лічачы, што гэты эпізод істотна паўплываў на ход матча і яго вынік.
Памілаваныя 15 чалавек, сярод якіх 13 палітвязняў15
Каментары
Потым гэты ж судзя прызначыў спрэчнае пінальцы ў браму Сінегала.
Судзя быў 12-м гульцом ў камандзе Марока. І гэта бачылі ўсе.