Расійская Служба знешняй разведкі выступіла з рэзкай заявай на адрас кіраўніка Канстанцінопальскага патрыярхату Варфаламея, назваўшы яго «антыхрыстам у расе» і абвінаваціўшы ў раскольніцкай дзейнасці. У афіцыйным прэс-рэлізе сцвярджаецца, што ён нібыта «раздрабніў праваслаўную Украіну», а цяпер скіроўвае сваю дзейнасць на краіны Балтыі, піша The Moscow Times.
Паводле СЗР, Варфаламей, якога ў дакуменце таксама называюць «д’яблам ува плоці», імкнецца выціснуць расійскае праваслаўе з Літвы, Латвіі і Эстоніі, ствараючы там царкоўныя структуры, падпарадкаваныя Канстанцінопалю. У расійскай разведцы заяўляюць, што ў гэтым яго падтрымліваюць брытанскія спецслужбы, улады балтыйскіх дзяржаў, а таксама мясцовыя нацыяналісты і неанацысты.
СЗР сцвярджае, што патрыярх спрабуе адарваць праваслаўныя цэрквы Літвы, Латвіі і Эстоніі ад Маскоўскага патрыярхату, пераманьваючы святароў і вернікаў у, як сказана, штучна створаныя маргінальныя рэлігійныя структуры.
Акрамя таго, ў заяве гаворыцца пра намер Варфаламея надаць аўтакефалію Чарнагорскай праваслаўнай царкве, што, на думку спецслужбы, павінна аслабіць Сербскую праваслаўную царкву. Прэс-рэліз завяршаецца цытатай з Нагорнай пропаведзі пра ілжэпрарокаў, якія прыходзяць «у авечай шкуры, а ўнутры — драпежныя ваўкі».
Варфаламей з’яўляецца кіраўніком Канстанцінопальскага патрыярхату і носіць тытул архіепіскапа Канстанцінопаля — Новага Рыма і Усяленскага патрыярха. У 2019 годзе ён надаў аўтакефалію Праваслаўнай царкве Украіны, што выклікала рэзкае непрыманне з боку Рускай праваслаўнай царквы. Пасля пачатку поўнамаштабнага ўварвання Расіі ва Украіну 24 лютага 2022 года патрыярх Варфаламей публічна асудзіў агрэсію.
Цяпер чытаюць
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА66
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА6
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары