У Еўракамісіі расказалі, куды пойдуць 30 мільёнаў еўра, якія выдаюцца Беларусі
У Еўракамісіі адказалі «Белсату» на пытанне адносна таго, на што пойдуць € 30 млн, выдадзеныя на 2026 год для падтрымання беларускай грамадзянскай супольнасці. Там таксама раскрылі дэталі таго, на што пайшлі раней выдадзеныя сродкі.
Прадстаўніца Еўракамісіі адзначыла, што «пасля фіктыўных выбараў 2020 года ў Беларусі дапамога ЕС была перанакіраваная ад беларускіх дзяржаўных органаў да недзяржаўных суб'ектаў». І новы пакет дапамогі сумай € 30 млн накіраваны на тры ключавыя галіны. Гэта:
- дапамога ахвярам рэпрэсій у аднаўленні свайго жыцця;
- павышэнне патэнцыялу свабодных медый і арганізацый грамадзянскай супольнасці ў супрацьдзеянні маніпуляцыям і дэзынфармацыі з боку рэжыму;
- прыцягненне да адказнасці за злачынствы, учыненыя беларускімі ўладамі.
«Гэта новае фінансаванне будзе накіравана праз правераных партнёраў-выканаўцаў арганізацыям грамадзянскай супольнасці, незалежным медыям, праваабаронцам, а таксама праз дзяржавы-чальцы ЕС або міжнародныя арганізацыі, якія валодаюць адпаведным досведам, адукацыйным установам», — гаворыцца ў адказе.
У Еўракамісіі заявілі, што з 2020 году агульная сума падтрымання ЕС дасягнула € 200 млн. Дзякуючы гэтаму ЕС «захаваў магчымасці дэмакратычнай Беларусі, садзейнічаючы пашырэнню правоў і магчымасцяў грамадзянскай супольнасці, абароне правоў чалавека і развіццю чалавечага капіталу Беларусі». Сярод іншага, былі распрацаваныя заканадаўчыя планы (напрыклад, Канстытуцыі, ролі прэзідэнта) для будучай Беларусі, што маюць падрыхтаваць глебу для магчымага дэмакратычнага пераходу. Таксама пры падтрыманні Еўрасаюза быў запушчаны тэлеканал Belarus Tomorrow, развіваліся сувязі паміж людзьмі і пашыралася мабільнасць. Гэтак, праект ArtPower Belarus дазволіў беларускім мастакам і дзеячам культуры захаваць беларускую мову і нацыянальную ідэнтычнасць у еўрапейскай культурнай прасторы. А праект «Адукацыя для беларусаў» выдаў стыпендыі больш як 600 беларусам для навучання ў Еўропе і атрымання важных навыкаў для сучаснай эканомікі.
Каментары
А что касается пункта "помощь жертвам репрессий в восстановлении своей жизни", то вчера мне попалась статистика: помогли где-то 10-11 тыс. человек