«Хачу ствараць звышлюдзей». У Бельгіі 15‑гадовы вундэркінд абараніў ужо другую доктарскую дысертацыю па фізіцы
Ларан Сімонс упершыню стаў доктарам навук у 12 гадоў. А цяпер працуе над трэцяй навуковай ступенню, піша BILD.
Бельгійскі падлетак Ларан Сімонс у 15 гадоў абараніў ужо другую доктарскую дысертацыю — упершыню ён зрабіў гэта яшчэ ў 12 гадоў. Ларан атрымаў школьны атэстат у 8 гадоў, у 11 скончыў магістратуру, а цяпер працуе над трэцяй навуковай ступенню ў Мюнхенскім цэнтры Гельмгольца, спалучаючы медыцыну і штучны інтэлект.
«Я хачу ствараць звышлюдзей. Такіх, якія скачуць як Майкл Джордан і бегаюць як алімпійцы», — расказаў вундэркінд.
Апошняя дысертацыя Ларана прысвечана тэарэтычнай квантавай фізіцы, да гэтага падлетак абараніў дысертацыю па эксперыментальнай фізіцы. З яго ўласных слоў, хлопец мае фатаграфічную памяць і здольнасць хутка знаходзіць сувязі паміж складанымі з'явамі.
Яго бацькі расказваюць, што незвычайныя здольнасці Ларана праявіліся ўжо ў дзяцінстве. У чатыры гады яго адправілі ў школу, у шэсць — у гімназію, дзе яму адразу далі індывідуальныя заняткі.
У восем ён здаў экзамены, у дзевяць паступіў ва ўніверсітэт, а ў 12 стаў адным з самых маладых дактарантаў у гісторыі інстытута Макса Планка. Ён сустракаўся з Папам, размаўляў з нобелеўскімі лаўрэатамі і выступаў у вядучых навуковых цэнтрах свету.
Нягледзячы на такую кар'еру, бацькі імкнуцца захаваць сыну нармальнае жыццё.
«Мне падабаецца катацца на картынгу і глядзець фільмы Marvel з сябрамі ў кінатэатры. Або мы адпачываем дома, гуляючы ў відэагульні, такія як Fortnite. Я магу паводзіць сябе як звычайны чалавек з сябрамі. Калі мне хочацца адцягнуцца, я слухаю музыку, а часам люблю патанцаваць», — расказаў Ларан.
Цяпер чытаюць
Айцішніка з «Варгеймінга» судзілі па расстрэльным артыкуле. Падобна, за падтрымку Украіны — праўда, зрабіць ён нічога не паспеў1
Каментары