У цэнтры Гродна прадаюць кватэру ў доме 1880 года з голымі сценамі. Колькі просяць?
Цэны на нерухомасць у абласным цэнтры апошнім часам моцна выраслі праз вялікі наплыў турыстаў. Паглядзіце, кватэру ў якім стане прадаюць па амаль $1400 за квадрат.
Аднапакаёўка агульнай плошчай 40 квадратных метраў знаходзіцца ў гістарычным цэнтры Гродна па вуліцы Леніна, 3 у доме 1880 года пабудовы.
Вышыня столі ў ёй 3,5 метра, што, па меркаванні прадаўцоў, можа дазволіць новым уладальнікам пры неабходнасці стварыць другі ўзровень (ці антрэсольны паверх). Сам дом быў рэканструяваны ў 2023 годзе і выглядае прыстойна, чаго нельга сказаць пра стан кватэры.
У памяшканні няма аздаблення сцен і столі. У некаторых сценах можна ўбачыць дзіркі. Адна са сцен, мяркуючы па матэрыяле, была пабудавана значна пазней, чым сам дом.
Месцамі са сцен выпадаюць цагліны. Такое жыллё ў апісанні да аб'екта называюць кватэрай з шыкоўнай планіроўкай у гістарычным цэнтры Гродна. «У кватэры праведзены поўны дэмантаж да цэглы, зроблена чыставая сцяжка, устаноўлены якасныя шклопакеты, металічныя ўваходныя дзверы», — гаворыцца ў апісанні.
За гэтую аднапакаёўку, якая патрабуе капітальных інвестыцый, просяць $55 тысяч, што складае $1375 за метр — пры сярэдніх $1080 на другасным рынку жылля Гродна.
Праз немалую цану і абадраныя сцены кватэра пачала набіраць папулярнасць у інстаграме. У каментарах пад пастом агенцтва адзін мужчына жартам спытаў, ці прадаецца яна разам з Audi A7, якая на фота.
Іншы мужчына пажартаваў, што за такія грошы прасцей тую Audi купіць і жыць у ёй, і нават грошы застануцца.
На пытанне, чаму так дорага, рыэлтарка адказала, што такія рэаліі рынку нерухомасці ў гістарычным цэнтры Гродна.
Падрабязней пра цэны на нерухомасць у гістарычным цэнтры Гродна мы пісалі раней.
Цяпер чытаюць
Вялікая гутарка з Лесяй Руднік пра сэксізм, мужа-рэслера, заробак доктаркі навук у Швецыі, апазіцыю і памылку Еўрасаюза25
Каментары