У Францыі двух блізнят абвінавачваюць у забойствах. Хто менавіта націснуў на курок, невядома — у іх аднолькавая ДНК
У Францыі двое аднаяйцавых блізнятаў апынуліся на лаве падсудных па абвінавачванні ў некалькіх забойствах.
Пракуроры пакуль не змаглі вызначыць, хто з іх страляў падчас аднаго з нападаў, паколькі абодва абвінавачаныя маюць аднолькавае ДНК, піша Бі-бі-сі.
Двум 33‑гадовым братам і яшчэ тром жыхарам Францыі выстаўленыя абвінавачванні ў двайным забойстве і яшчэ некалькіх спробах здзейсніць забойствы. Гаворка ідзе пра падзеі, якія адбыліся ў верасні 2020 года.
Пракуроры мяркуюць, што абвінавачаныя былі членамі банды, якая дзейнічае ў прыгарадах Парыжа.
У датычнасці да злачынстваў падазраюцца абодва браты, але адно з галоўных пытанняў — чый менавіта генетычны матэрыял быў выяўлены на аўтамаце, які выкарыстоўваўся падчас аднаго з нападаў, — застаецца адкрытым.
Супрацоўнік паліцыі паведаміў суду, што эксперты так і не змаглі высветліць, хто з іх спусціў курок. «Іх можа адрозніць толькі маці», — сказаў адзін са следчых у судзе.
Паведамляецца, што атмасфера ў зале пасяджэнняў была надзвычай напружаная. У чацвер блізняты былі выдалены з суда, паколькі адмовіліся ўстаць.
Як заяўляе паліцыя, браты выкарыстоўвалі сваё падабенства, каб схаваць сляды здзейсненых імі злачынстваў. Le Parisien цытуе аднаго з паліцэйскіх, па словах якога яны часта абменьваліся адзеннем, тэлефонамі і дакументамі.
Ідэнтычныя блізняты развіваюцца ў адной аплодненай яйкаклетцы, якая дзеліцца падчас цяжарнасці напалову. У іх цалкам аднолькавае ДНК, таму эксперты не могуць вызначыць, чый менавіта генетычны матэрыял быў знойдзены на зброі.
Аднолькавыя, але не зусім
Разам з тым, сучасныя тэхналогіі ў некаторых выпадках дазваляюць адрозніць генетычныя ўзоры ідэнтычных блізнят.
У жніўні 2025 года ў ЗША адзін з блізнят быў упершыню прысуджаны на падставе аналізу ДНК. Прысяжныя прызналі 54‑гадовага Расэла Марубіа вінаватым у згвалтаванні, здзейсненым у 1987 годзе.
Тады аказалася, што выяўленае падчас следства ДНК належыць двум братам-блізнятам — і спробы раскрыць злачынства былі прыпыненыя.
Аднак амаль 40 гадоў пазней навукоўцы змаглі выявіць некаторыя ўнікальныя мутацыі, якія адбыліся ўжо пасля раздзялення яйкаклеткі.
«У сярэднім у блізнят ёсць восем такога роду адрозненняў, якія прыпадаюць на 3 млрд асноў [геному]», — цытуе выданне Элен Грэйтак, прадстаўніка кампаніі Parabon, якая займаецца даследаваннямі ДНК.
У выніку эксперты змаглі ідэнтыфікаваць некаторыя з гэтых малюсенькіх мутацый, і адзін з братоў быў прызнаны вінаватым.
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары