Лекцыі віцебскага доктара і палітэмігранта Уладзіміра Мартава пра мозг зрабіліся на ютубе хітом
Вядомы віцебскі доктар-рэаніматолаг Уладзімір Мартаў, які быў вымушаны пакінуць Беларусь і цяпер жыве ў Літве, стаўся аўтарам цыкла публічных лекцый па нейрабіялогіі і псіхафізіялогіі: як уладкаваны наш мозг, як ён стаўся такім і хто яго падманвае, заўважыў канал «Витебск, я гуляю».
Ягоныя выступы — пра стрэс, дэпрэсію, эвалюцыю і выспяванне мозгу, свядомасць і філасофію смерці — выходзяць на канале псіхолага і экс-дырэктаркі ліквідаванага Гродзенскага дзіцячага хоспіса Вольгі Вялічкі, якая таксама ў эміграцыі.
Выпускі Мартава рэгулярна збіраюць дзясяткі тысяч праглядаў.
У нядаўніх выпусках ён тлумачыць, як адрозніць выгаранне ад дэпрэсіі, чаму мозг падлетка рызыкуе і як стрэс можа дэфармаваць разумовыя працэсы. У іншым — разважае пра феномен свядомасці, а ў апошнім — пра «філасофію смерці» і страх небыцця.
Вольга Вялічка паведамляла раней, што задумвала цыкл з пяці лекцый Мартава. Ці працягнецца праз такую запатрабаванасць выпуск ролікаў, невядома.
Каментары