Беларус у Лодзі заўважыў, што аўтамабіль едзе па зялёнай зоне, і не прайшоў міма.
23‑гадовы беларус Аляксей (імя зменена) дапамог пажылой жанчыне з дэменцыяй у Лодзі. Пра гэта ён расказаў журналістам BGmedia.
Пасля падзей 2020 года Аляксей быў вымушаны з'ехаць з Беларусі і ўладкаваўся ў другім па велічыні горадзе Польшчы. Нядаўна ён гуляў па раёне, дзе жыве, і заўважыў чырвоны аўтамабіль, які няўпэўнена рухаўся па зялёнай зоне і спрабаваў выехаць проста на пешаходны пераход.
«Я зразумеў — нешта тут не так, падышоў да кіроўцы. Гэта аказалася пажылая жанчына. Яна спытала, як ёй даехаць дадому, і назвала адрас. У навігатары я ўбачыў, што гэта далёка, спрабаваў патлумачыць маршрут. Але яна была ў прастрацыі. Тады я прапанаваў завезці яе», — успамінае беларус.
Па дарозе жанчына некалькі разоў пыталася ў яго імя і адразу забывала адказ. Так Аляксей зразумеў, што ў яе сур'ёзныя праблемы з памяццю.
Дома згубленую жанчыну чакаў засмучаны муж — ён ужо паведаміў у паліцыю пра знікненне жонкі.
Мужчына расказаў, што яна пакутуе на дэменцыю і звычайна застаецца дома, хоць можа раптоўна паспрабаваць «паехаць да сяброў», якіх у яе няма.
Такія выпадкі здараліся не раз: раней мужчына двойчы шукаў жонку, якая заблукала ў горадзе. У гэты дзень ён збіраўся ў паліклініку, жонка папрасілася з ім. Калі ён выйшаў з паліклінікі, ні аўтамабіля, ні жонкі ўжо не было.
«Дзіўна, што яна змагла з'ехаць так далёка і пры гэтым па зялёнай зоне, не па дарозе. Яна магла пацярпець сама ці кагосьці збіць. Добра, што ўсё скончылася добра», — кажа Аляксей.
Пажылы паляк расказаў, што яны з жонкай жывуць самотна, дзяцей няма, толькі старэнькі сабака. На развітанне ён падзякаваў хлопцу за дапамогу.
Цяпер чытаюць
Модная мінская кавярня «Маркс» трапіла ў скандал: адтуль папрасілі сысці жанчыну, якая малявала. Але ўсё не так адназначна15
Каментары