Беларуская рэперка Мэйбі Бэйбі наведала Дзярждуму і адправіла гуманітарную дапамогу расійскім войскам
Раней дзяўчыну ўнеслі ў спіс непажаданых у Расіі артыстаў.
Ураджэнка Жабінкі спявачка Мэйбі Бэйбі (сапраўднае імя беларускі — Вікторыя Лысюк) наведала Дзяржаўную Думу Расіі і разам з кіраўніком ЛДПР Леанідам Слуцкім узяла ўдзел у адпраўцы гуманітарнай дапамогі ў зону «Спецыяльнай ваеннай аперацыі».
Пра гэта паведаміла моладзевая арганізацыя ЛДПР у сваім канале. Падзея адбылася да Дня народнага адзінства, які ў РФ адзначаюць 4 лістапада.
У сваім канале Вікторыя Лысюк пажартавала пра візіт у Дзярждуму: «Наведала Дзярждуму, абмеркавалі законапраект аб увядзенні падаткаў на дысы без панчлайнаў».
Учынак спявачкі адбыўся на фоне нядаўняга канфлікту з расійскай рэперкай Інстасамкай. Летам Інстасамка публічна абвінаваціла Мэйбі Бэйбі ў недахопе патрыятызму і дрэнным уплыве на моладзь праз альбомы з «разбуральным кантэнтам».
У кастрычніку выданне Mash пісала, што ў выніку гэтага канфлікту ўлады правялі праверку песень Мэйбі Бэйбі і ўнеслі яе ў спіс непажаданых артыстаў. Пад пагрозай аказаўся вялікі тур па расійскіх гарадах.
Аднак цяпер, вынікае, з канцэртамі дзяўчыны ўсё будзе ў парадку. У Мэйбі Бэйбі, да таго ж, запланаваны выступ у прыфрантавым Растове-на-Доне.
Каментары