Музыка напісаў яе амаль 40 гадоў таму, але публічна выконваў усяго некалькі разоў. Яе захавала дачка былога генконсула Швецыі ў Ленінградзе, піша «Медуза».
Калекцыянер Сяргей Чубраеў выявіў запіс амаль невядомай песні лідара гурта «Кіно» Віктара Цоя «Дзеці хвілін», якую музыка напісаў у 1988 годзе.
Касета з запісам, зробленым 24 чэрвеня 1988 года ў Ленінградзе, доўгія гады захоўвалася ў Сары Акерэн, дачкі былога генеральнага консула Швецыі. Пра гэта гаворыцца ў інтэрв’ю Чубраева выданню «Собака», якое выйшла 21 чэрвеня да дня нараджэння Цоя, і ў 17‑хвілінным дакументальным фільме «Прывітанне Карлу Густаву», які выпусціў лэйбл «Союз Мьюзик». У заключнай частцы фільма гучыць сама песня.
Чубраеў распавёў, што знайшоў тэкст песні «Дзеці хвілін» у архіве басіста гурта «Звуки Му» Аляксандра Ліпніцкага, які загінуў у 2021 годзе.
«Віктар Цой спяваў яе толькі для блізкіх сяброў, забараняў запісваць на магнітафон і казаў, што не гатовы публічна яе выконваць», — падзяліўся Чубраеў.
Паводле яго слоў, першапачаткова лічылася, што ўдалося захаваць толькі тэкст песні — Цой напісаў словы па просьбе Ліпніцкага.
Сам Ліпніцкі распавядаў у сваім фільме пра «Кіно», які выйшаў у 2008 годзе, што ўпершыню пачуў песню «Дзеці хвілін» у 1988 годзе, калі Цой выканаў яе ў Маскве. «На маё пытанне, ці ўвойдзе яна ў новы альбом «Кіно», ён адказаў адмоўна: «Ні ў якім разе. Яна многіх пакрыўдзіць»», — казаў Ліпніцкі.
Чубраеў распавёў, што пачаў шукаць запіс песні ў замежнікаў, якія ў 1980‑я гады прыязджалі ў Ленінград. «І даволі хутка выйшаў на Сару Акерэн, дачку генеральнага консула Швецыі ў Ленінградзе. Яна прыязджала сюды [ў Ленінград] на канікулы і хутка пасябравала з андэграўнднай тусоўкай. У тым ліку з Цоем. Я пачаў з ёй перапіску і распавёў, што шукаю «Дзяцей хвілін», на што яна адказала: «Я запісала яе на плэер!»».
Акерэн зрабіла запіс на вечарыне ў музыканта, удзельніка гурта «Кіно» Георгія Гур’янава. «Віця для нас спяваў па некалькі разоў любімыя песні тыпу «Когда твоя девушка больна», «Братская любовь», — распавяла Окерэн. — І раптам вырашыў праспяваць для нас новую песню. Ён трошкі саромеўся, не быў упэўнены, але насамрэч адчувалася, што ён хоча яе праспяваць. У мяне з сабой быў Walkman, плэер, і я запісала».
На запісе чуваць, як Цой кажа сваім сябрам, што песня, магчыма, страціла актуальнасць, і адзначае, што ў тэксце шмат цытат з песень іншых музыкантаў: «Шмат цытат вельмі. Цяжка зразумець, бо гэта як палеміка з іншымі гуртамі. Таму што вельмі шмат іх радкоў».
Сяргей Чубраеў дадаў, што на касеце таксама ёсць і іншыя песні, якія ніхто ніколі не чуў у акустыцы, у тым ліку «Пачка сигарет» і «Любовь — это не шутка». «Я спадзяюся, у будучыні мы іх таксама выкладзем у інтэрнэт», — адзначыў калекцыянер.
Цяпер чытаюць
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1111
Каментары
[Зрэдагавана]