35‑гадовы дальнабойшчык з Беларусі раптоўна памёр у Кітаі. Гэта муж самай тытулаванай беларускай дзюдаісткі
Некалькі гадоў таму Марына Слуцкая перастала трэніраваць зборную, каб больш часу быць з мужам, Аляксеем Кузьмічом.
Адбылася трагедыя ў Кітаі, дзе працаваў Аляксей Кузьміч — у мужчыны здарыўся інфаркт падчас загрузкі.
Кузьмічу было ўсяго 35 гадоў, ён любіў ганяць на матацыкле і быў фанатам рыбалкі.
У кастрычніку 2022 года мужчына сустрэў сваё каханне — Марыну Слуцкую, самую тытулаваную беларускую дзюдаістку ў гісторыі. Яна 8‑разовая чэмпіёнка Беларусі, чэмпіёнка Еўропы, пераможца II Еўрапейскіх гульняў, удзельніца летніх Алімпійскіх гульняў 2020 года ў Токіа.
У 2021 годзе Марына скончыла спартыўную кар’еру і стала трэнеркай нацыянальнай зборнай. Але ў 2023 годзе вырашыла пайсці і адтуль, каб удзяляць больш часу мужу.
Сваё рашэнне Марына ў інтэрв'ю тлумачыла так: «Мой муж — дальнабойшчык, ён ездзіць на дастаткова доўгія рэйсы: у Казахстан, Кітай, Еўропу… Здаралася, што Лёшы не было два з паловай месяцы, апошні раз ён планаваў паездку на тры тыдні, а вярнуўся праз паўтара месяца. Добра, калі нашы графікі супадалі: муж у службовым падарожжы, я на сустрэчах ці спаборніцтвах. Аднак часта здаралася інакш: ён вяртаецца, а я з'язджаю на наступны дзень. Такая неадпаведнасць выклікала стрэс, і відавочна трэба было з гэтым нешта рабіць».
Таму яны разам вырашылі, што Аляксей будзе ездзіць у рэйсы і зарабляць, а Марына зоймецца домам і стане трэніраваць дзяцей у клубе дзюдо, дзе яна была адной з кіраўніц.
Марына падкрэслівала: алімпійскі медаль (які яна не атрымала) не меў для яе столькі значэння, колькі магчымасць мець сям’ю: «Я моцная жанчына, якая ўвойдзе ў палаючую хату і спыніць каня, але я вельмі хацела, каб дома сустракаў каханы чалавек, адчуваць яго падтрымку і моцнае плячо. І я яго сустрэла. Не паверыце: на сайце знаёмстваў. Праз год згулялі вяселле».
У 2024 годзе, каб лепш разумець каханага, Марына нават паехала з ім у чарговы рэйс — і месяц правяла разам з мужам у кабіне фуры.
«Па дарозе я карміла мужа з лыжачкі, дапамагала яму ў прычэпе, чакала яго на пагрузачнай рампе, трохі капрызіла, крыўдзілася, але з кожным днём кахала яго ўсё больш і больш… Так, мы пару разоў сварыліся, некаторы час крыўдзіліся, эмацыянальна мірыліся, дзяліліся ўспамінамі і эмоцыямі, жаданнямі і марамі, пілі каву на запраўцы, сустракалі разам усходы і захады сонца», — пісала потым Марына ў інстаграме.
Казала, што пасля той вандроўкі стала яшчэ больш ганарыцца мужам і цаніць яго.
Летась у пары нарадзіўся сын, якога назвалі Макарам.
Цяпер чытаюць
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1919
Каментары