Чарговы незвычайны лот з Беларусі на Ebay. Выданне MYFIN заўважыла, што сотню капеечных манет спрабуюць прадаць за $78. Прычым гэты ж прадавец выставіў аналагічны лот і за $689,99.
Прадавец знаходзіцца ў ЗША, абяцае дастаўку за 2—3 дні (яна будзе каштаваць дадаткова $5).
Чаму за беларускія капейкі хочуць столькі грошай?
Па каментар выданне звярнулася да нумізмата — вось што адказаў Сяргей Колбун:
— У гэтым лоце няма нічога эксклюзіўнага: ні браку, ні спецыяльнай серыі. Гэта звычайныя манеты. Прываблівае толькі тое, што яны не былі ва ўжытку, а таксама тое, што іх адразу сто штук. Хутчэй за ўсё, прадавец разлічвае альбо на замежнікаў, якія ніколі не бачылі нашых капеек, альбо на перакупнікаў, якія потым будуць прадаваць іх даражэй паштучна. Указаны адрас адпраўкі — USA. Магчыма, высокая цана праз тое, што гэтыя манеты вельмі далёка ад краіны абарачэння. Але нягледзячы на ўсё гэта, думаю, цана на гэты лот непамерна завышаная.
Каментары