Прэзідэнт ЗША заявіў, што падчас сваёй хуткай сустрэчы з лідарам Кітая Сі Цзіньпінам спадзяецца абмеркаваць спосабы заканчэння вайны ва Украіне.
Трамп гутарыў з журналістамі на борце прэзідэнцкага самалёта, які накіроўваецца ў Азію, дзе кіраўнік Белага дома мае намер правесці пяць дзён. Ён наведае Малайзію, Японію і Паўднёвую Карэю, а таксама возьме ўдзел у сустрэчы Асацыяцыі дзяржаў Паўднёва-Усходняй Азіі (АСЕАН), якая ў нядзелю пачынаецца ў Куала-Лумпуры, паведамляе Бі-бі-сі.
Трампа спыталі, ці спадзяецца ён на дапамогу Кітая ў пытанні ўрэгулявання расійска-украінскай вайны.
«Мы б хацелі, каб Кітай нам дапамог з Расіяй, — адказаў прэзідэнт ЗША. — Мы ўвялі супраць Расіі вельмі вялікія санкцыі. Я думаю, гэтыя санкцыі будуць мець вельмі абавязковую сілу. Але я хацеў бы, каб Кітай нам дапамог».
Падчас нядаўняга саміту ЕС у Бруселі прэзідэнт Украіны Уладзімір Зяленскі заявіў, што Кітай не зацікаўлены ў перамозе Кіева і паражэнні Масквы.
Журналісты таксама спыталі Трампа, ці не баіцца ён, што ўведзеныя ім супраць Расіі санкцыі прывядуць да эскалацыі з боку прэзідэнта Расіі Уладзіміра Пуціна.
«Я так не думаю. Ён жа казаў, што яны не будуць мець такога ўжо вялікага ўплыву. Ён так кажа. Я не думаю, што ён мае рацыю ў гэтым пытанні. Пабачым, што будзе. Я думаю, што ён таксама хоча гэта скончыць», — адказаў прэзідэнт ЗША.
Цяпер чытаюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары