У цэнтры Масквы нешта ўзарвалася ў элітным рэстаране — трое загінулых
Увечары 1 жніўня ў рэстарацыі Balzi Rossi на Кудрынскай плошчы ў цэнтры Масквы адбыўся выбух. Паводле папярэдняй інфармацыі, загінулі тры чалавекі, яшчэ каля 20 атрымалі траўмы, піша The Moscow Times.
На момант здарэння ў рэстаране праходзіла вяселле, у якім удзельнічалі каля 50 чалавек. Для іншых наведвальнікаў установа была закрытая. Сярод пацярпелых ёсць і супрацоўнікі рэстарацыі.
На месца здарэння прыбылі пажарнікі, ратавальнікі і медыкі. Параненых эвакуююць на насілках і дастаўляюць у бальніцы машынамі хуткай дапамогі.
Прычыны выбуху пакуль высвятляюцца. Паводле адной з версій, магло адбыцца ўзгаранне і выбух газавага абсталявання на кухні. Паводле іншай — выбух адбыўся ў гасцявой зале рэстарана. Афіцыйнага пацвярджэння прычын пакуль няма.
Крыніца выдання Astra паведаміла, што ў рэстаране, дзе адбыўся выбух, маглі адзначаць дзень нараджэння нейкага генерала.
Паводле яе слоў, каля рэстарана нібыта было прыпаркавана шмат аўтамабіляў з чорнымі дзяржаўнымі нумарамі. Такія нумарныя знакі звычайна выкарыстоўваюцца на транспарце Узброеных сіл Расіі, а таксама шэрагу іншых сілавых ведамстваў. Акрамя таго, побач з рэстаранам знаходзіўся аўтобус Расгвардыі. Пацвярджэнняў гэтай інфармацыі, аднак, пакуль няма.
У сувязі з надзвычайным здарэннем маскоўскія ўлады перакрылі рух на ўчастку ад станцыі метро «Барыкадная» да Навінскага бульвара. Таксама быў адменены начны велафестываль, а яго ўдзельнікаў эвакуявалі з Садовага кальца.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»6
Каментары