«Дурніца скончылася». Лукашэнка даручыў навесці ў АПК Віцебскай вобласці жалезны парадак
«Няхай збяруць там механізатараў, даярак і іншых. І да 1 студзеня ўсё, што ў вас ёсць, вылізана, вычышчана».
Лукашэнка даручыў да 1 студзеня навесці ў АПК Віцебскай вобласці жалезны парадак. Пра гэта ён заявіў на нарадзе ў Віцебску, паведамляе БелТА.
«Я не прыехаў у Віцебскую вобласць, каб вас запалохаць. Мы з вамі 30 гадоў працуем, вы ведаеце мае падыходы. Калі вы мяне не зразумелі, падманулі — усё будзе ўзмоцнена да мяжы», — заявіў ён.
Аляксандр Лукашэнка параіў схему, паводле якой трэба дзейнічаць на розных узроўнях: «Пасля сённяшняй сустрэчы старшыні райвыканкамаў паклікалі галоўных спецыялістаў і кіраўнікоў, давялі ім гэту жорсткую размову. Далі ім да 7 лістапада тэрмін — у вас больш няма — навесці жалезны парадак у гаспадарках. Яны — кіраўнікі і спецыялісты — няхай збяруць там механізатараў, даярак і іншых. І да 1 студзеня ўсё, што ў вас ёсць, вылізана, вычышчана».
Калі дзесьці ў гаспадарках ёсць нястача кадраў для гэтага, то даручыў прыцягваць шэфскую дапамогу іншых прадпрыемстваў. «Людзі прыехалі, зрабілі, аднавілі», — сказаў ён.
«Усё, мужыкі. Дурніца скончылася», — папярэдзіў Аляксандр Лукашэнка.
Ён у чарговы раз адзначыў, што хоча захаваць вёскі.
Паводле інфармацыі КДК, загрузка магутнасцяў малакаперапрацоўчых прадпрыемстваў Віцебскай вобласці ў 2025 годзе складае крыху больш за 60%. Па мясе — менш за палову — 49%.
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары