У вышук абвясцілі магілёўскага дэпутата і прадзюсара. З ім за мяжу з'ехала вядучая дзяржаўнага тэлеканала
Нядаўна МУС абвясціла ў вышук Аляксандра Лаўрыновіча — у мінулым прадзюсара прапагандысцкіх мерапрыемстваў і дэпутата гарадскога савета Магілёва. Цяпер стала вядома, што паехаў ён не адзін: выглядае на тое, што разам з ім за мяжу накіравалася тэлевядучая дзяржканала «Беларусь 2» Наталля Паўшок, расказвае «Люстэрка».
Што за Лаўрыновіч і чаму ён у вышуку
Аляксандр Лаўрыновіч — дырэктар і заснавальнік кампаніі «Фестывалі Бай», якая займалася арганізацыяй канцэртаў, фестываляў і конкурсаў талентаў. У СМІ ён з’яўляўся таксама як прадзюсар «нацыянальнага» рэаліці-шоу «Фабрыка блогераў» і інтэрактыўнага серыяла «Зумеры», а таксама настаўнік у шоу АНТ «Зорны шлях».
У пачатку 2026 года ў сілавых ведамстваў узніклі пытанні да дзейнасці Лаўрыновіча, а сам ён пакінуў краіну. 17 сакавіка Следчы камітэт забараніў уладальніку «Фестывалі Бай» прадаваць свае долі ў кампаніі. 10 красавіка 2026 года прадзюсара абвясцілі ў вышук.
Паводле інфармацыі «Люстэрка», Лаўрыновіч фігуруе як падазраваны ў разбіральніцтве па карупцыйных артыкулах. У справе фігуруе сума звыш 200 тысяч рублёў. Падставай для прэтэнзій стала арганізацыя гарадскіх мерапрыемстваў у Брэсце.
«Кінула працу», знікла з сацсетак
Разам з Лаўрыновічам Беларусь пакінула тэлевядучая Наталля Паўшок, паведамілі крыніцы «Люстэрка».
«Кінула працу на тэлебачанні і збегла з ім, нават заяву [на звальненне] не напісаўшы, — сцвярджае крыніца. — <…> Ён нават не развеўся з жонкай. Проста кінуў іх з дзіцем і пакаціў».
Суразмоўца «Люстэрка» сцвярджае, што экс-дэпутат меў раман з Паўшок.
Наталлі Паўшок 29 гадоў, яна працавала на дзяржаўным тэлеканале «Беларусь 2». Была вядучай і рэдактарам моладзевага інтэрактыўнага праекта «Пін код», выпускаючым рэдактарам, карэспандэнтам ранішняга шоу «Добрай раніцы, Беларусь», рэдактарам праграмы «Нічога сабе ньюз».
У мінулым Паўшок удзельнічала ў праектах каманды Лаўрыновіча — вяла «Фабрыку блогераў» і была крэатыўнай прадзюсаркай серыяла «Зумеры».
Цяпер беларускі нумар тэлефона тэлевізійшчыцы недаступны. З лютага 2026 года ў яе Instagram перасталі з’яўляцца новыя публікацыі.
У шоу «Пін код» Наталля больш не працуе. Мяркуючы па тэлеграм-канале праекта, у лютым быў перабой з выпускамі, у сакавіку адна з падпісчыц цікавілася, чаму праграму «больш не паказваюць». Да канца месяца анонсы зноў сталі рэгулярнымі, але праграма змяніла графік выхаду — замест чатырох выпускаў на тыдзень цяпер выпускаюць толькі адзін. У красавіку новай вядучай «Пін кода» стала 16‑гадовая спявачка Настасся Лупіна, якая выступае пад псеўданімам Стася Корсак.
«Міжнародная кампанія, якая адкрыла прадстаўніцтва ў ААЭ»
А чым далей заняліся Лаўрыновіч і Паўшок? У тым жа месяцы, калі абедзве асобы зніклі з сацсетак, іх імёны з’явіліся ў публікацыі новага праекта Creative global group, які займаўся арганізацыяй мерапрыемстваў у Дубаі. «Мы міжнародная кампанія, якая адкрыла прадстаўніцтва ў ААЭ», — сцвярджалі яе стваральнікі.
У сацсетках праекта Лаўрыновіча прадстаўлялі дырэктарам, а Паўшок — партнёркай і крэатыўнай прадзюсаркай. Рэкламу новай фірмы актыўна рассылалі па чатах рускамоўных жыхароў Дубая. Цікава, што пад адным з такіх пастоў Паўшок з асабістага акаўнта пакінула рэкамендацыю, быццам сама была кліенткай фірмы і ёй усё спадабалася.
Арганізатары былі гатовыя правесці вяселле ці дзіцячы дзень нараджэння, а таксама «прывезці любых артыстаў, ад сусветных зорак да топ-выканаўцаў». У сацсетках яны паказвалі выявы, згенераваныя штучным інтэлектам, а таксама ранейшыя праекты каманды Лаўрыновіча — фестываль Millennium у Брэсце і серыял «Зумеры».
Незразумела, ці правяла гэтая «міжнародная кампанія» хаця б адно мерапрыемства. У красавіку яе акаўнты сталі прапаноўваць ужо іншую паслугу — дызайн рэкламы і публікацый у сацыяльных сетках, а неўзабаве згарнулі актыўнасць.
«Працуем у пары»
З нумарам тэлефона эмірацкай фірмы быў звязаны тэлеграм-акаўнт з імем A&N. За гэтымі літарамі ў тэорыі могуць стаяць імёны Аляксандр і Наталля. «Працуем у пары: таргетынг, AI-крэатывы, сцэнарыі, прадзюсаванне, СММ», — гаворыцца ў яго апісанні.
Ужо ў красавіку 2026 года аўтары акаўнта зацікавіліся новым пераездам. «Мы пара з Беларусі. Плануем пераезд у Іспанію. Разглядаем горад Альмерыя», — пісалі яны за дзень да абвяшчэння Лаўрыновіча ў міждзяржаўны вышук на радзіме.
Праз некалькі тыдняў яны ўжо прадстаўляліся расіянамі і збіраліся ў Чарнагорыю, пасля выведывалі наконт легалізацыі ў Мексіцы. Мяркуючы па актыўнасці ў чатах, у выніку A&N усё ж такі апынуліся ў Чарнагорыі.
Нядаўна парны акаўнт пачаў прасоўваць новы праект, тварам якога выступіла Наталля Паўшок. Цяпер былая тэлевядучая прапануе анлайн-заняткі па мастацкай гімнастыцы. Яна прадстаўляецца як «майстар спорту, член нацыянальнай зборнай, чэмпіёнка рэспублікі і трэнер па мастацкай гімнастыцы».
Паўшок сапраўды ў мінулым займалася мастацкай гімнастыкай прафесійна і трэніравала дзяцей. Праўда, у новым акаўнце яна чамусьці не паказвае сваё прозвішча і не піша, у нацыянальную зборную якой краіны ўваходзіла. Кансультаваць яна гатовая толькі анлайн на рускай або англійскай мовах.
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»48
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары
- А Дынама бяжыць?
- Усе бягуць!