Прэзідэнт Мадагаскара Андры Радзуэліна заявіў, што ў краіне адбываецца спроба незаконнага і неканстытуцыйнага захопу ўлады. Праз некалькі гадзін пасля таго вайсковае падраздзяленне CAPSAT (карпус кадравых і адміністрацыйна-тэхнічных службаў) аб’явіла, што пераняла кіраванне ваенным камандаваннем і цяпер кантралюе ўсе ўзброеныя сілы — сухапутныя, паветраныя і марскія. Гэтае падраздзяленне раней адыграла ключавую ролю ў палітычным крызісе 2009 года, які прывёў Андры Радзуэліну да ўлады, піша Бі-бі-сі.
Пратэсты на Мадагаскары пачаліся 25 верасня. Спачатку людзі выйшлі супраць адключэнняў вады і электрычнасці, але хутка дэманстрацыі перараслі ў шырэйшае незадавальненне ўрадам Радзуэліны з-за высокага ўзроўню беспрацоўя, карупцыі і росту цэнаў. У суботу некаторыя салдаты пакінулі казармы на ўскраінах сталіцы краіны Антананарыву і далучыліся да пратэстоўцаў перад гарадской радай.
CAPSAT асудзіла выкарыстанне сілы сілавымі структурамі падчас разгону апошніх пратэстаў у Антананарыву. Адначасова адміністрацыя прэзідэнта заявіла, што Андры Радзуэліна і новы прэм’ер-міністр Руфін Зафісамба — генерал арміі, прызначаны напярэдадні — кантралююць сітуацыю.
Згодна з данымі ААН, з пачатку пратэстаў у Мадагаскары загінулі 22 чалавекі, але прэзідэнт краіны назваў гэтыя лічбы «памылковымі» і сцвярджае, што загінулі 12 чалавек, якіх ён ахарактарызаваў як «марадзёраў і вандалаў».
У заяве Радзуэліны гаворыцца, што спроба захопу ўлады з’яўляецца поўным парушэннем Канстытуцыі і дэмакратычных прынцыпаў. Ён заклікаў усе ключавыя сілы краіны аб’яднацца для абароны канстытуцыйнага парадку і нацыянальнага суверэнітэту.
CAPSAT абвясціла аб прызначэнні генерала Дэмасфена Пікуласа новым начальнікам штаба. У нядзелю раніцай паступілі паведамленні пра перастрэлкі ў лагеры CAPSAT падчас перамоў з жандармерыяй. Падрабязнасцяў пакуль няма.
Цяпер чытаюць
Шрайбман з калегамі прапанавалі пакрокавы план дээскалацыі адносін Беларусі і ЕС26
Каментары