Што гэта за рэдказямельныя металы, за якія Трамп раз'юшыўся на Кітай

Якія пастаўкі абмежаваў Кітай і чаму яны важныя

Гаворка ідзе пра рэдказямельныя металы — групу хімічных элементаў, якія, нягледзячы на сваю назву, не з'яўляюцца рэдкімі ў зямной кары. Аднак іх здабыча — складаны і дарагі працэс, бо яны рассеяныя сярод іншых парод і мінералаў.

Месцаў з высокай канцэнтрацыяй найбольш запатрабаваных элементаў вельмі мала, і адно з такіх знаходзіцца ў паўднёвым Кітаі. Менавіта таму краіна на сёння забяспечвае каля 90% сусветных паставак гэтых рэсурсаў.

Адзін з найважнейшых такіх элементаў — дыспрозій. Калі параўноўваць тэхналагічную індустрыю з пякарняй, дыспрозій быў бы як разрыхляльнік для цеста: ён выкарыстоўваецца ў невялікіх колькасцях, але без яго немагчыма стварыць рухавікі для электрамабіляў, ветраныя турбіны, вайсковую тэхніку і абсталяванне для вытворчасці чыпаў.

Што канкрэтна зрабіў Кітай?

Міністэрства гандлю Кітая значна ўзмацніла існуючы экспартны кантроль, піша The Wall Street Journal. Цяпер любая кампанія — кітайская ці замежная — павінна атрымаць дазвол ад уладаў КНР на экспарт любой прадукцыі, калі больш за 0,1% яе кошту складаюць рэдказямельныя элементы.

Таксама быў пашыраны спіс забароненых для экспарту рэдказямельных элементаў, а іх пастаўкі для выкарыстання ў вайсковых мэтах за мяжой былі цалкам забароненыя. Адначасова Пекін увёў партовыя зборы для амерыканскіх судоў і пачаў антыманапольнае расследаванне ў дачыненні да кампаніі Qualcomm. Усё гэта — частка кампаніі ў адказ на гандлёвыя абмежаванні з боку Вашынгтона.

Павялічыць

Якія кампаніі пацярпяць?

Якія канкрэтна прадукты закрануць новыя правілы, пакуль не ясна. Пад ударам могуць апынуцца як сама сыравіна (чыстыя рэдказямельныя металы), так і прадукты іх першаснай апрацоўкі, перадусім магутныя рэдказямельныя магніты. Акрамя таго, абмежаванні могуць закрануць і любыя больш складаныя кампаненты, у складзе якіх ёсць гэтыя элементы. Хутчэй за ўсё, Пекін наўмысна пакідае фармулёўкі туманнымі, каб захаваць гнуткасць на перамовах са Штатамі.

Аналітыкі з Capital Economics мяркуюць, што гатовыя спажывецкія тавары, такія, як ноўтбукі і смартфоны, хутчэй за ўсё, не дасягнуць устаноўленага парога ў 0,1%. Аднак прамежкавыя тавары, напрыклад, рухавікі, могуць яго перавысіць.

Кітай заявіў, што будзе асабліва ўважліва кантраляваць экспарт прадукцыі, прызначанай для стварэння перадавых чыпаў або падтрымкі даследаванняў у галіне штучнага інтэлекту. Гэта прамы ўдар па амерыканскіх лідарах, такіх як Nvidia.

Аналітыкі бачаць у новых правілах яшчэ адну схаваную пагрозу. Пад ударам могуць апынуцца нават такія гіганты, як Boeing — кампаніі, якія працуюць адначасова і на вайсковы, і на грамадзянскі рынак. Эксперты мяркуюць, што ім могуць цалкам перакрыць доступ да рэсурсаў, нават для вытворчасці выключна грамадзянскай прадукцыі.

Ці пойдзе Кітай да канца і што могуць зрабіць ЗША?

Многія аналітыкі лічаць, што гэтыя абмежаванні — тактыка, якую абраў Пекін напярэдадні перамоваў, хоць некаторыя забароны, мусіць, застануцца ў доўгатэрміновай перспектыве. У адказ Дональд Трамп прыгразіў увядзеннем 100% мытаў на кітайскія тавары і дапусціў, што можа адмяніць сустрэчу з Сі Цзіньпінам.

У ЗША таксама ёсць свае рычагі ўплыву: яны вырабляюць чыпы для штучнага інтэлекту і прамысловую прадукцыю, напрыклад, рэактыўныя рухавікі, якія Кітай пакуль не здольны асвоіць самастойна.

Разумеючы сваю ўразлівасць, Вашынгтон пачаў дзейнічаць, каб пазбавіцца ад кітайскай залежнасці. Ён будуе ўласны, поўны ланцужок паставак — не проста для здабычы сыравіны, а менавіта для вытворчасці рэдказямельных магнітаў. Радовішчы рэдказямельных элементаў ёсць і за межамі Кітая, аднак галоўная праблема не ў самой здабычы, а ў іх далейшай апрацоўцы.

Кітай з'яўляецца амаль манапалістам ва ўсім тэхналагічным ланцужку — ад узбагачэння руды да вытворчасці гатовых магнітаў. Каб стварыць з нуля ўласную інфраструктуру, супастаўную з кітайскай, ЗША спатрэбяцца гады.

• 2
• 0
• 2
• 2
• 4
• 1
• 1
• 0