Дроны над пляжам, груз 200 і не працуе GPS. Як беларусы сёлета адпачывалі ў Крыме
Крым у 2025 годзе прыцягвае турыстаў, нягледзячы на вайну і той адбітак, што яна накладае, даводзіць прапагандыст з «Мінскай праўды», які з'ездзіў у верасні на адпачынак на акупаваны паўвостраў.
На Крымскім мосце хадзіць па вагоне забаронена
Аэрапорт Сімферопаля застаецца зачыненым, таму карэспандэнт «МП» ехаў на цягніку. Падчас праезду па мосце пасажырам забаронена фатаграфаваць, здымаць відэа і нават перамяшчацца па цягніку — на гэты час зачыняюцца нават туалеты. Прычына — «стратэгічная значнасць» аб'екта. Парушальнікаў папярэджваюць пра магчымыя «сур’ёзныя наступствы».
Закрытыя зоны адпачынку
Сімферопаль і іншыя гарады паўвострава выглядаюць ажыўлена: турысты, таксоўшчыкі, вулічны гандаль, распавядае выданне.
«Але калі прыгледзецца, на ўсёй гэтай бясхмарнай турыстычнай карціне ўсё роўна быў бачны пэўны цень таго, што час неспакойны. То тут, то там сустракаюцца вайскоўцы, вось у транспартным струмені мільгануў аўтобус з таблічкай «Груз 200» на лабавым, вось на стэндзе гандлёвага цэнтра ўлёткі, якія заклікаюць на вайсковую службу па кантракце. У чарзе да кас турыстычных славутасцяў можна ўбачыць мужчын, якія дастаюць пасведчанні ўдзельніка СВА для пакупкі льготнага білета», — заўважае аўтар «МП».
Асабліва прыкметны ўплыў баявых дзеянняў на захадзе Крыма — каля Тарханкуту, у пасёлку Мірны, на касе Бяляус. Гэтыя зоны цяпер зачынены. У Севастопалі можна ўбачыць бамбасховішчы, а ў публічных месцах развешаны ўлёткі з правіламі паводзін пры паветранай трывозе.
Але, піша выданне, гэта не значыць, што «ўзбярэжжа стала пустыняй з вайсковымі дэкарацыямі». Там, дзе палічылі бяспечным для турыстаў, «каляндар фестываляў, канцэртаў, арт-праектаў нават у верасні ўражвае сваёй насычанасцю».
Лётаюць дроны і кулі
Аўтар апісвае, як падчас адпачынку над пляжам праляцеў дрон, які неўзабаве быў збіты. Праз некалькі хвілін прагрымеў выбух. Аўтар называе гэты момант «без перабольшання эпізодам баявых дзеянняў СВА».
«Дарэчы, калі вы раптам падумаеце, што пасля гэтага ўсе ў паніцы сталі збіраць намёты і з'язджаць далей ад гэтага месца, то нічога падобнага. Некаторыя тут жа пабеглі ўверх па ўзгорку, жадаючы разгледзець лепш месца здарэння. Эпізод цалкам звыклы, ніякай панікі, пляжны рэлакс працягнуўся», — піша аўтар.
Уначы таксама стралялі, дадае ён, «але недзе далёка».
«Я выглянуў з палаткі і ўбачыў у цёмна-сінім небе ярка-ружовыя дарожкі трасіруючых куль. Як гаворыцца, відовішча прыгожае, а сітуацыя — не», — дадае рамантыкі аўтар.
Што мясцовыя?
— А ці не страшна вам у сувязі з усімі гэтымі падзеямі? — задаў пытанне дзяўчыне-барберу беларускі турыст.
— А чаго раптам страшна? — аўтар даводзіць, што суразмоўца нібыта і «пытанне не зусім зразумела».
— Як жылі, так і жывём. Ну ёсць нейкія абмежаванні ў інтэрнэце, у навігацыі, бамбасховішчы недзе паставілі. Але пра збітыя дроны, у асноўным, самі ў навінах чытаем, а на свае вочы не кожны крымчанін нават нешта падобнае бачыў. Працягваем жыць: водзім дзяцей у школы, ходзім на працу, ездзім на любімыя пляжы ў вольны час, — прыводзіць словы мясцовай выданне.
Навігатар увесь час накіроўвае ў мора
Побытавай праблемай, з якой сутыкнуўся аўтар, стала тое, што навігатар не працуе.
«Калі вы будзеце ў Сімферопалі ці іншым вялікім горадзе паўвострава, то не дзівіцеся, што ваш дакладны сябар навігатар у тэлефоне паказвае ваша месцазнаходжанне… дзесьці ў моры. Ваш тэлефон не зламаўся і не перагрэўся. Проста ў некаторых раёнах Крыма GPS-каардынаты адлюстроўваюцца не зусім карэктна ці зусім не адлюстроўваюцца. Не выключана, што гэта адна актуальная з мер бяспекі», — піша ён.
Па Крыме ён перамяшчаўся на арандаваным аўтамабілі, таму адсутнасць навігатара яго спачатку засмуціла, «асабліва ўлічваючы архітэктурную какафонію вуліц і завулкаў крымскай сталіцы».
«Прыйшлося ўспамінаць, як арыентавацца па паказальніках вуліц і дарожным знакам — добрая разміначка для мозгу і нагода задумацца аб тым, як тэхнічны прагрэс робіць нас крыху бездапаможнымі, прымушае забыцца на даступныя рэсурсы свядомасці. Бо ездзілі ж да навігатараў людзі па паказальніках і паспяхова спраўляліся», — знайшоў пазітыў аўтар.
Турысты едуць
Аўтар піша, што турыстаў на паўвостраве хапае.
«На набярэжных Ялты, Судака, Феадосіі кіпіць шумнае і вясёлае жыццё. Праводзяцца фестывалі, канцэрты, балі, працуюць аквапаркі і дэльфінарыі. Экскурсіі ў горы, конныя прагулкі, джып-туры збіраюць аншлагі, а ў касы цудоўных палацаў крымскага паўднёвабярэжжа выстройваюцца чэргі. Рэстараны, кавярні, пякарні вабяць духмянымі пахамі. Курсіруе грамадскі транспарт. <> Кіраўніцтва рэгіёну трымае сітуацыю пад кантролем, наладжана аператыўнае інфармаванне насельніцтва першымі асобамі рэгіёна аб надзвычайных сітуацыях і неабходных мерах бяспекі» — піша аўтар.
Паводле звестак акупацыйных уладаў, з пачатку года Крым наведалі 5,3 млн турыстаў, што на 15% больш, чым летась, прыводзіць лічбы выданне.
Колькі сёлета трацілі на вяселлі ў Беларусі? Сабралі рэальныя лічбы тых, хто пабываў у ЗАГСе6
Каментары