У Ельскай цэнтральнай раённай бальніцы памерла непаўналетняя дзяўчынка. Ёй было 14 гадоў, паведаміла газета райвыканкама «Народны голас» пасля таго, як інфармацыя пачала абмяркоўвацца ў сацсетках, піша «Флагшток».
Паводле афіцыйных звестак, у Ельскі РАУС 17 мая паступіла паведамленне з ЦРБ пра смерць у рэанімацыйным аддзяленні непаўналетняй. Следчы камітэт праводзіць праверку.
«Пасля правядзення працэсуальных дзеянняў і праверачных мерапрыемстваў па дадзеным факце будзе дадзена прававая ацэнка, у тым ліку і дзеянням асоб, што аказвалі медыцынскую дапамогу», — паведаміў начальнік Ельскага РАСК Аляксей Уласенка.
Канал «Караельск» у TikTok распавёў неафіцыйныя падрабязнасці. Паводле даных рэсурсу, у бальніцу дзяўчынку прывёз бацька — у дзіцяці былі кашаль і хрыплыя гукі ў грудзях. Праз некалькі гадзін пасля шпіталізацыі доктар паведаміла сям’і, што стан дзяўчынкі рэзка пагоршыўся: яна ўпала ў кому і была пераведзена ў рэанімацыю.
Бацькі прыехалі ў бальніцу і на працягу чатырох гадзін, да шасці вечара, чакалі прыбыцця рэанімацыйнай брыгады з Мазыра. Прыехалі двое медыкаў, якія ў выніку адмовіліся ад транспарціроўкі з-за цяжкага стану дзіцяці.
Затым была выклікана брыгада з Гомеля, якая прыбыла толькі каля 00:00. Праз некаторы час бацьку паведамілі пра смерць дачкі. На дадзены момант доктарка, якая лячыла дзяўчынку, працягвае працаваць.
Канал выказвае надзею, што трагедыя зверне ўвагу на недахоп профільных спецыялістаў у рэгіянальных медыцынскіх установах.
Відэа сабрала сотні каментарыяў, у некаторых з якіх карыстальнікі выказваюць сваё бачанне сітуацыі.
Як сцвярджае адзін з каментатараў, «усё адбылося з-за доктара які паставіў няправільную кропельніцу» — у дзіцяці была алергія на антыбіётык.
«Пра гэта доктар папросту мог не ведаць, а маланкавая форма анафілактычнага шоку — гэта не нешта новае! Таму віны доктара тут няма», — адказалі карыстальніку.
«Нармальныя дактары заўсёды робяць пробу на антыбіётык!» — запярэчыў іншы каментатар.
Іншыя карыстальнікі абурыліся тым, як доўга ехалі медыкі з суседняга горада: «Як можна чакаць брыгаду 4 гадзіны з Мазыра? Там ехаць 30 хвілін — гэта гаворыць пра некампетэнтнасць супрацоўнікаў».
У каментарыях таксама згадваецца відэа бацькі дзіцяці, у якім ён распавядае пра тое, што здарылася. Але на яго старонцы гэтага відэа ўжо няма — верагодна, сілавікі прымусілі выдаліць ролік.
У публікацыі раённай газеты начальнік Ельскага РАСК «звяртае ўвагу на недапушчальнасць распаўсюджвання здагадкаў і інфармацыі, не праверанай кампетэнтнымі асобамі» і палохае крымінальнай справай за паклёп.
Цяпер чытаюць
Прамова гэтага мінскага выпускніка на лінейцы ў 2020-м узарвала інтэрнэт. Што з хлопцам цяпер?1
Каментары