U Jelskaj centralnaj rajonnaj balnicy pamierła niepaŭnaletniaja dziaŭčynka. Joj było 14 hadoŭ, paviedamiła hazieta rajvykankama «Narodny hołas» paśla taho, jak infarmacyja pačała abmiarkoŭvacca ŭ sacsietkach, piša «Fłahštok».
Pavodle aficyjnych źviestak, u Jelski RAUS 17 maja pastupiła paviedamleńnie z CRB pra śmierć u reanimacyjnym adździaleńni niepaŭnaletniaj. Śledčy kamitet pravodzić pravierku.
«Paśla praviadzieńnia pracesualnych dziejańniaŭ i pravieračnych mierapryjemstvaŭ pa dadzienym fakcie budzie dadziena pravavaja acenka, u tym liku i dziejańniam asob, što akazvali miedycynskuju dapamohu», — paviedamiŭ načalnik Jelskaha RASK Alaksiej Ułasienka.
Kanał «Karajelsk» u TikTok raspavioŭ nieaficyjnyja padrabiaznaści. Pavodle danych resursu, u balnicu dziaŭčynku pryvioz baćka — u dziciaci byli kašal i chrypłyja huki ŭ hrudziach. Praź niekalki hadzin paśla špitalizacyi doktar paviedamiła siamji, što stan dziaŭčynki rezka pahoršyŭsia: jana ŭpała ŭ komu i była pieraviedziena ŭ reanimacyju.
Baćki pryjechali ŭ balnicu i na praciahu čatyroch hadzin, da šaści viečara, čakali prybyćcia reanimacyjnaj bryhady z Mazyra. Pryjechali dvoje miedykaŭ, jakija ŭ vyniku admovilisia ad transparciroŭki z-za ciažkaha stanu dziciaci.
Zatym była vyklikana bryhada z Homiela, jakaja prybyła tolki kala 00:00. Praź niekatory čas baćku paviedamili pra śmierć dački. Na dadzieny momant doktarka, jakaja lačyła dziaŭčynku, praciahvaje pracavać.
Kanał vykazvaje nadzieju, što trahiedyja źviernie ŭvahu na niedachop profilnych śpiecyjalistaŭ u rehijanalnych miedycynskich ustanovach.
Videa sabrała sotni kamientaryjaŭ, u niekatorych ź jakich karystalniki vykazvajuć svajo bačańnie situacyi.
Jak śćviardžaje adzin z kamientataraŭ, «usio adbyłosia z-za doktara jaki pastaviŭ niapravilnuju kropielnicu» — u dziciaci była alerhija na antybijotyk.
«Pra heta doktar paprostu moh nie viedać, a małankavaja forma anafiłaktyčnaha šoku — heta nie niešta novaje! Tamu viny doktara tut niama», — adkazali karystalniku.
«Narmalnyja daktary zaŭsiody robiać probu na antybijotyk!» — zapiarečyŭ inšy kamientatar.
Inšyja karystalniki aburylisia tym, jak doŭha jechali miedyki z susiedniaha horada: «Jak možna čakać bryhadu 4 hadziny z Mazyra? Tam jechać 30 chvilin — heta havoryć pra niekampietentnaść supracoŭnikaŭ».
U kamientaryjach taksama zhadvajecca videa baćki dziciaci, u jakim jon raspaviadaje pra toje, što zdaryłasia. Ale na jaho staroncy hetaha videa ŭžo niama — vierahodna, siłaviki prymusili vydalić rolik.
U publikacyi rajonnaj haziety načalnik Jelskaha RASK «źviartaje ŭvahu na niedapuščalnaść raspaŭsiudžvańnia zdahadkaŭ i infarmacyi, nie pravieranaj kampietentnymi asobami» i pałochaje kryminalnaj spravaj za paklop.
Ciapier čytajuć
Ukrainskaja madel zhulała z hruzinskim biznesmienam viasielle ŭ Kanach na 5 miljonaŭ jeŭra. Viadučymi byli Jaŭhien Pierlin i Maksim Hałkin11
Kamientary