«Па аналітычных цэнтрах трампістаў ходзіць Прэйгерман і настойвае на вывадзе Беларусі з ізаляцыі нават без лібералізацыі»
У новым выпуску ТОКу Наста Роўда разам з эканамічнай аглядальніцай Вольгай Лойка абмеркавалі перспектывы Беларусі ў новай геапалітычнай сітуацыі.
«Я ведаю, што проста зараз па амерыканскіх аналітычных цэнтрах трампістаў ходзіць Яўген Прэйгерман, які лабіруе інтарэсы Лукашэнкі, — расказала Наста Роўда. — Там не толькі адбельванне Лукашэнкі, кшталту «ён больш адэкватны за Пуціна, з ім прасцей весці перамовы, з ім лепш мець нейкія стасункі». [Ён абмяркоўвае,] канечне, эканамічную палёгку — зняцце нейкіх санкцый. Але больш за тое, ён настойвае на вывадзе Беларусі з ізаляцыі без лібералізацыі».
Яна дадала, што бачыць у гэтым лабіраванні пэўную рызыку:
«Можна меркаваць, што Беларусь можа пайсці азербайджанскім шляхам. То-бок адбудзецца «азербайджанізацыя» Беларусі, калі цяперашні стан рэчаў стане перманентным, нармальным. То-бок, наяўнасць палітвязняў у Беларусі — гэта ок. Усе пра іх забудуць. Незалежных СМІ ў краіне не будзе. Тое, што мы маем зараз, стане новай нармальнасцю. І Лукашэнка выйдзе з ізаляцыі. Для Лукашэнкі ўсё будзе ок, для людзей усё застанецца так, як ёсць зараз».
Яўген Прэйгерман — выпускнік факультэта міжнародных адносін Беларускага дзяржаўнага ўніверсітэта, доктар палітычных навук. Дырэктар Рады міжнародных адносін «Мінскі дыялог», якая арганізоўвала аднайменныя канферэнцыі, якія сталі месцам неафіцыйных кантактаў уладаў Беларусі з заходнімі палітыкамі. Прэйгермана называюць пазаштатным супрацоўнікам Міністэрства замежных спраў Беларусі. Ён не аднойчы абвінавачваўся ў працы на рэжым Лукашэнкі і лабіраванне яго інтарэсаў.
На погляд Вольгі Лойка, ад амерыканцаў ёсць дакладны пасыл — з палітвязнямі гэтай нармалізацыі не будзе.
«Я не веру ў тое, што без спынення рэпрэсій у Лукашэнкі ў гэты раз атрымаецца вывернуцца. (…) Я сумняваюся і ў тым, што ён зможа іх спыніць на самой справе. Гэта, бадай, адзіны песімізм, у адваротным выпадку аптымізму было б болей. Наколькі Лукашэнка кіруе сітуацыяй у Беларусі, каб нешта спыніць? Наколькі ён суб'ектны цяпер? Ці можа ён указваць сваім людзям у пагонах? Мы не ведаем. Можам толькі цьмяна здагадвацца.
Па-добраму, на самой справе, трэба было б завязваць, таму што пяцігадовы тэрмін даўнасці скончыўся па ўсіх гэтых каментарыях, лайках. Ну, заканчваецца. І можна пачынаць заканчваць гэтую тэму. Але яна не заканчваецца. Яна зручная, яна камфортная. Яна, як «генацыд беларускага народа». Займаўся б і займаўся. Таму гэта пытанне — ці можа ён (Лукашэнка. — НН) даказаць усім, што ён гэта можа».
Глядзіце цалкам:
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары