«Разумеў беларускі боль апошніх стагоддзяў». Памёр гісторык Ян Ежы Мілеўскі
19 лютага ў Беластоку памёр гісторык Ян Ежы Мілеўскі. Яму было 73 гады. Ягоныя навуковыя інтарэсы закраналі не толькі родную Беласточчыну, але і суседнюю Гродзеншчыну. Яго добра ведалі і прымалі ў беларускіх гістарычных асяродках, ён быў шчырым сябрам Беларусі.
Ян Ежы Мілеўскі атрымаў адукацыю ў Варшаўскім універсітэце, пасля чаго з пачатку 1980-х працаваў у Інстытуце гісторыі Беластоцкага філіяла Варшаўскага ўніверсітэта, які ў 1997 годзе быў пераўтвораны ў Беластоцкі ўніверсітэт. Там ён і працаваў усё жыццё да самага выхаду на пенсію. У тым ліку шмат гадоў ён займаў у розных падраздзяленнях Беластоцкага ўніверсітэта, звязаных з гісторыяй і гуманітарыстыкай, кіраўнічыя пасады.
Даследчыя інтарэсы Мілеўскага канцэнтраваліся на найноўшай гісторыі Польшчы і паўночна-ўсходніх ваяводстваў Польшчы ў міжваенны час. Ягоная навуковая спадчына налічвае каля 300 публікацый, выдадзеных не толькі ў Польшчы, але і за мяжой, у тым ліку ў Беларусі. Значнае месца ў ягоных працах займалі даследаванні, прысвечаныя гарадскім супольнасцям, такім як Гродна, Беласток, Сувалкі, а таксама польска-яўрэйскім адносінам у гады Другой сусветнай вайны.
Ян Ежы Мілеўскі часта браў удзел у навуковых канферэнцыях, круглых сталах і тэматычных сустрэчах у Беларусі, у першай палове 1990-х гадоў быў запрошаны ў польска-беларускую камісію па школьных падручніках па гісторыі.
Пра яго цёпла ўспамінаюць беларускія гісторыкі. Так, вядомы навуковец з Гродна Алесь Смалянчук напісаў у сацсетках, што гэта быў
«разумны і добры чалавек, выбітны гісторык, якога высока цанілі ў Польшчы, любілі і паважалі ў Беларусі і Літве. Не шукаў ворагаў у гісторыі, разумеў беларускі боль апошніх стагоддзяў».
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве55
Каментары