Расія не можа з-за санкцый прадаць мільёны барэляў нафты і рыхтуецца скарачаць здабычу

Са слоў суразмоўцаў агенцтва, развітальныя санкцыі адміністрацыі Джо Байдэна, пад якія трапілі «Газпрам нафта», «Сургутнафтагаз», а таксама 180 танкераў «ценявога флоту», прывялі да таго, што ў Расіі ўзнік лішак нафты, якую немагчыма вывезці за мяжу.

Экспартныя пастаўкі з партоў Усць-Лугі і Прыморска на Балтыйскім моры, а таксама з Наварасійска на Чорным моры ў студзені ўпалі на 17%, а кошт фрахту танкераў для вывазу нафты праз ціхаакіянскі порт Козьміна ўзляцеў у 5 разоў.

У выніку за месяц санкцый у нафтавікоў назапасілася 17 млн нераспрададзеных барэляў, якія дрэйфуюць у танкерах, ператвораных у плывучыя сховішчы. Да пачатку лета гэты аб'ём можа вырасці да 50 млн барэляў, прагназуюць аналітыкі Goldman Sachs.

Падзець гэтую нафту дэ-факта няма куды: буйных сховішчаў у Расіі практычна няма, а тыя, што ёсць, трапілі пад студзеньскія налёты дронаў. Перапрацаваць лішнюю нафту на НПЗ таксама складана: праз удары БПЛА страчаныя 10% магутнасцяў нафтазаводаў, у тым ліку Разанскага, Валгаградскага і Астраханскага, а іх рамонт зойме месяцы, кажуць крыніцы Reuters.

Па іх словах, адзіным выхадам для нафтавікоў становіцца скарачэнне здабычы — яно можа пачацца ў найбліжэйшыя месяцы і паскорыцца, калі праблемы з танкерамі і НПЗ не будуць развязаныя.

Цяпер Расія пампуе 8,9 млн барэляў у суткі, выконваючы здзелку па скарачэнні здабычы АПЕК+. У параўнанні з рэкордам 2019 года (11,25 млн барэляў у дзень) нафтаздабыча ўжо скарацілася на 20%.

Пад санкцыі трапіла пятая частка флоту, які вазіў нафту, нягледзячы на санкцыі, кажуць крыніцы Reuters. Для гэтых танкераў закрыліся некаторыя парты Індыі і Кітая, якія патрабуюць, каб барэлі вазілі не ўключаныя ў «чорныя спісы» судны. Адначасова індыйскія і кітайскія НПЗ, якія скупляюць амаль 90% марскога экспарту расійскай нафты, спешна шукаюць альтэрнатывы — у Саудаўскай Аравіі, Іраку і Аб'яднаных Арабскіх Эміратах.

Першымі «пад нож» могуць пайсці арктычныя радовішчы, дзе Расія здабывае 300 тысяч барэляў за дзень: яны засталіся без танкераў лядовага класа, замяніць якія немагчыма.

Колькасць суднаў «ценявога флоту» пад заходнімі абмежаваннямі перавысіла 270. У чорных спісах, паводле даных S& P Global, апынуліся танкеры, якія вазілі палову марскога экспарту нафты з Расіі, або 1,5 млн барэляў у дзень — каля 1 млн у Кітай і каля 500 тысяч — у Індыю.

Паводле ацэнак расійскага Альфа-банка, праз санкцыі Расія можа страціць нафтавы экспарт у аб'ёме да 800 тысяч барэляў на дзень — або кожны трэці барэль, што танкеры вывозяць морам з партоў. Гэта пазбавіць эканоміку каля $50 млрд экспартнай выручкі штогод і можа прывесці да дэвальвацыі рубля да ўзроўняў вышэй за 130 за даляр, пісалі экспэрты Цэнтра макраэканамічнага аналізу і кароткатэрміновага прагназавання.

• 22
• 0
• 2
• 0
• 0
• 0
• 0
• 2