Чым займаліся супрацоўнікі Акрэсціна да таго, як узначаліць месца катаванняў беларусаў?

Валанцёры пад сценамі ізалятара ў ноч на 12 жніўня 2020 года запісалі аўдыя, на якіх чуваць гукі ўдараў, а таксама крыкі і стогны людзей. З Акрэсціна выходзілі ў сіняках і кровападцёках, у слязах. 

Сведчанні пра нялюдскае абыходжанне з палітычнымі арыштантамі там працягваюць з’яўляцца і сёння, праз пяць год пасля пратэстаў.

Пры гэтым праз месяц пасля жнівеньскіх падзей прапагандыст Рыгор Азаронак зняў на Акрэсціна рэпартаж, паказаўшы, як нібыта цудоўна там жывецца затрыманым. Усё гэта пацвярджаў Яўген Шапецька — начальнік Цэнтра ізаляцыі правапарушальнікаў ГУУС Мінгарвыканкама.

Павялічыць

Што цікава, згодна з інфармацыяй з баз, якой з намі падзяліліся «Кіберпартызаны», іншай працы ў Шапецькі да Акрэсціна і не было.

Павялічыць

Ігар Кенюх у жніўні 2020-га ўзначальваў ізалятар часовага ўтрымання ГУУС Мінгарвыканкама. Па інфармацыі сведак, ён наўпрост быў датычны да жорсткага абыходжання з затрыманымі. Таксама ён імкнуўся паўплываць на працу медыкаў, загадваючы прыбраць з Акрэсціна «нядобранадзейных» дактароў, якія дазваляюць сабе спачуваць зняволеным.

Па словах аднаго з затрыманых, якога ў 2021 годзе схапілі за тое, што ён уключыў пад сценамі ізалятара ў сваёй Tesla песню «Разбуры турмы муры», Кенюх пагражаў яму згвалтаваннем дубінкай. «Ракам яго! І да «пеўняў» у камеру яго! Зараз цябе вы*буць два нямытыя зэкі!», «Табе п*здзец! Я цябе згнаю ў турме», — пагражаў ён мужчыну.

Па інфармацыі «Кіберпартызанаў», Ігар Кенюх пачынаў сваю працу ў сілавым апараце з участковага Партызанскага РУУС у Мінску. Пасля быў дзяжурным у РУУС Заводскага раёна. А да таго, як надзець форму, быў заняты ў Мілашавіцкім лясгасе.

Павялічыць

Асобна ў сценах Акрэсціна праславіўся чалавек, які не быў на кіруючых пасадах — Яўген Урублеўскі. «Самы жорсткі карнік з супрацоўнікаў» — менавіта так апісвалі свае ўражанні ад сутыкнення з гэтым чалавекам розныя беларусы. Пры тым што ў 2020 годзе Урублеўскаму было толькі 24 гады.

«Быў і адзін сумна вядомы персанаж — Яўген Урублеўскі. Яшчэ да суда ў адной жанчыны моцна балела галава, яна папрасіла таблетку; хтосьці папрасіў туалетнай паперы. Дык ён так раззлаваўся, пачаў хаміць. Потым Урублеўскі вывеў гэтую жанчыну ў іншы пакой і ўдарыў галавой аб сцяну. Я біла рукамі ў дзверы, адбіла далоні. Я яму адпаведна адказала, бо не магла стрымацца. Ён і на мяне замахваўся, але побач былі іншыя супрацоўнікі, дык да ўдару справа не дайшла», — расказвала пра яго былая выкладчыца Лінгвістычнага ўніверсітэта, палітзняволеня Наталля Дуліна.

Вось яшчэ некалькі сведчанняў ад беларусаў са справаздачы Міжнароднага камітэта па расследаванні катаванняў у Беларусі:

«Мы стаялі на каленях, рукі за галаву, а гэты Жэня ўвесь час нас біў»; «Гэты Яўген суправаджаў нас з камеры, гарлапаніў на ўсіх матам і біў дручком, калі нехта не стаяў, уткнуўшыся ў сцяну».

Дзе ж раней працаваў Урублеўскі да таго, як стаць камандзірам аддзялення ў Цэнтры ізаляцыі правапарушальнікаў? Як ні дзіўна — таксама ў атачэнні людзей — напрыклад, у кафэ «Гараж» і ў краме.

Усе гэтыя людзі знаходзяцца пад санкцыямі і абвешчаныя ў міжнародны вышук за злачынствы, звязаныя з пазбаўленнем волі чалавека і здзейсненыя з асаблівай жорсткасцю.

• 7
• 0
• 1
• 1
• 0
• 1
• 30
• 0