Трамп абяцае «рэвалюцыю здаровага сэнсу». Адразу пасля інаўгурацыі ён падпіша шэраг указаў
Абраны прэзідэнт Дональд Трамп і абраны віцэ-прэзідэнт Джэй Дзі Вэнс 20 студзеня заступілі на пасады. Цырымонія інаўгурацыі праходзіць у ратондзе Капітолія, а Трамп выступіў з інаўгурацыйнай прамовай, у якой выказаў асноўныя прынцыпы свайго новага кіравання.
«Залаты век Амерыкі пачынаецца цяпер», — пачаў Трамп, звяртаючыся да ўдзельнікаў цырымоніі.
«Мы павінны быць сумленнымі адносна выклікаў, з якімі мы сутыкнуліся», — працягваў ён, адзначыўшы, што «ўрад сутыкнуўся з крызісам даверу».
«Па краіне ідзе хваля перамен, — падкрэсліваецца ў інаўгурацыйнай прамове Трампа. — Сёння я падпішу шэраг гістарычных указаў. Гэтымі дзеяннямі мы пачынаем поўнае аднаўленне Амерыкі і рэвалюцыю здаровага сэнсу».
Трамп раскрытыкаваў кіраўніцтва Байдэна за апошнія чатыры гады, асабліва ў галіне іміграцыі і рэакцыі на нядаўнія прыродныя катастрофы, хоць ён не згадаў свайго папярэдніка па імені.
«Мае нядаўнія выбары — гэта мандат на поўную і абсалютную ліквідацыю жудаснай здрады і ўсіх шматлікіх здрад, якія мелі месца, і на тое, каб вярнуць людзям іх веру, багацце, дэмакратыю і, вядома ж, свабоду», — заявіў Трамп.
«З гэтага моманту заняпад Амерыкі заканчваецца», — гаворыць ён. «Наша свабода і слаўны лёс нашай нацыі больш не будуць аспрэчвацца, і мы неадкладна адновім сумленнасць, кампетэнтнасць і вернасць урада Амерыкі».
Падчас сваёй інаўгурацыйнай прамовы Дональд Трамп паабяцаў першым сваім указам увесці надзвычайнае становішча на мяжы ЗША і Мексікі.
«Мы пачнем працэс вяртання мільёнаў і мільёнаў нелегальных іншаземцаў туды, адкуль яны прыехалі», — заявіў ён.
Акрамя таго, Трамп паабяцаў падпісаць указ аб неадкладнай адмене ўсёй урадавай цэнзуры, каб вярнуць свабоду слова ў Амерыку. Прытым, па словах Трампа, з сённяшняга дня афіцыйная палітыка ЗША заключаецца ў прызнанні толькі двух гендараў — мужчынскага і жаночага.
Таксама ён хоча абвясціць рэжым надзвычайнага становішча ў ЗША ў сферы энергетыкі для стымулявання здабычы энергарэсурсаў, а наркакартэлі вырашыў абвясціць тэрарыстычнымі арганізацыямі.
«Мы будзем займацца бурэннем. Мы будзем выкарыстоўваць нашыя вялізныя радовішчы нафты», — заявіў новы прэзідэнт ЗША.
Трамп назваў сябе міратворцам, а яшчэ ўспомніў замах на яго і дадаў, што «быў выратаваны Богам, каб зноў зрабіць Амерыку вялікай».
Таксама ён паўтарыў дадзеныя яшчэ да інаўгурацыі абяцанні перайменаваць Мексіканскі заліў у заліў Амерыкі, а таксама вярнуць ЗША кантроль над Панамскім каналам. Прагучала і новае абяцанне — паставіць амерыканскі сцяг на Марсе.
Пры гэтым Дональд Трамп ні разу не згадаў у сваёй прамове пра Украіну і Расію. Ён заявіў толькі пра намер пабудаваць «самую моцную армію, якую калі-небудзь бачыў свет», адзначыўшы, што ваенны поспех ЗША з гэтага часу будзе вымярацца «не толькі перамогамі ў бітвах, але і войнамі, якіх удалося пазбегнуць».
Каментары