Tramp abiacaje «revalucyju zdarovaha sensu». Adrazu paśla inaŭhuracyi jon padpiša šerah ukazaŭ
Abrany prezident Donald Tramp i abrany vice-prezident Džej Dzi Vens 20 studzienia zastupili na pasady. Cyrymonija inaŭhuracyi prachodzić u ratondzie Kapitolija, a Tramp vystupiŭ ź inaŭhuracyjnaj pramovaj, u jakoj vykazaŭ asnoŭnyja pryncypy svajho novaha kiravańnia.
«Załaty viek Amieryki pačynajecca ciapier», — pačaŭ Tramp, źviartajučysia da ŭdzielnikaŭ cyrymonii.
«My pavinny być sumlennymi adnosna vyklikaŭ, ź jakimi my sutyknulisia», — praciahvaŭ jon, adznačyŭšy, što «ŭrad sutyknuŭsia z kryzisam davieru».
«Pa krainie idzie chvala pieramien, — padkreślivajecca ŭ inaŭhuracyjnaj pramovie Trampa. — Siońnia ja padpišu šerah histaryčnych ukazaŭ. Hetymi dziejańniami my pačynajem poŭnaje adnaŭleńnie Amieryki i revalucyju zdarovaha sensu».
Tramp raskrytykavaŭ kiraŭnictva Bajdena za apošnija čatyry hady, asabliva ŭ halinie imihracyi i reakcyi na niadaŭnija pryrodnyja katastrofy, choć jon nie zhadaŭ svajho papiarednika pa imieni.
«Maje niadaŭnija vybary — heta mandat na poŭnuju i absalutnuju likvidacyju žudasnaj zdrady i ŭsich šmatlikich zdrad, jakija mieli miesca, i na toje, kab viarnuć ludziam ich vieru, bahaćcie, demakratyju i, viadoma ž, svabodu», — zajaviŭ Tramp.
«Z hetaha momantu zaniapad Amieryki zakančvajecca», — havoryć jon. «Naša svaboda i słaŭny los našaj nacyi bolš nie buduć asprečvacca, i my nieadkładna adnovim sumlennaść, kampietentnaść i viernaść urada Amieryki».
Padčas svajoj inaŭhuracyjnaj pramovy Donald Tramp paabiacaŭ pieršym svaim ukazam uvieści nadzvyčajnaje stanovišča na miažy ZŠA i Mieksiki.
«My pačniem praces viartańnia miljonaŭ i miljonaŭ nielehalnych inšaziemcaŭ tudy, adkul jany pryjechali», — zajaviŭ jon.
Akramia taho, Tramp paabiacaŭ padpisać ukaz ab nieadkładnaj admienie ŭsioj uradavaj cenzury, kab viarnuć svabodu słova ŭ Amieryku. Prytym, pa słovach Trampa, ź siońniašniaha dnia aficyjnaja palityka ZŠA zaklučajecca ŭ pryznańni tolki dvuch hiendaraŭ — mužčynskaha i žanočaha.
Taksama jon choča abviaścić režym nadzvyčajnaha stanovišča ŭ ZŠA ŭ śfiery enierhietyki dla stymulavańnia zdabyčy enierharesursaŭ, a narkakarteli vyrašyŭ abviaścić terarystyčnymi arhanizacyjami.
«My budziem zajmacca bureńniem. My budziem vykarystoŭvać našyja vializnyja radoviščy nafty», — zajaviŭ novy prezident ZŠA.
Tramp nazvaŭ siabie miratvorcam, a jašče ŭspomniŭ zamach na jaho i dadaŭ, što «byŭ vyratavany Boham, kab znoŭ zrabić Amieryku vialikaj».
Taksama jon paŭtaryŭ dadzienyja jašče da inaŭhuracyi abiacańni pierajmienavać Mieksikanski zaliŭ u zaliŭ Amieryki, a taksama viarnuć ZŠA kantrol nad Panamskim kanałam. Prahučała i novaje abiacańnie — pastavić amierykanski ściah na Marsie.
Pry hetym Donald Tramp ni razu nie zhadaŭ u svajoj pramovie pra Ukrainu i Rasiju. Jon zajaviŭ tolki pra namier pabudavać «samuju mocnuju armiju, jakuju kali-niebudź bačyŭ śviet», adznačyŭšy, što vajenny pośpiech ZŠA z hetaha času budzie vymiaracca «nie tolki pieramohami ŭ bitvach, ale i vojnami, jakich udałosia paźbiehnuć».
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary