Палітвязню Вацлаву Арэшку — 70 гадоў, ён асуджаны на восем гадоў
18 студзеня споўнілася 70 гадоў палітвязню Вацлаву Арэшку. Вядомы актывіст прафсаюзу РЭП трэці раз адзначае дзень нараджэньня ў няволі, піша Радыё Свабода.
Вацлава Арэшку асудзілі на 8 гадоў зняволення, яго трымаюць у калоніі № 22 пад Івацэвічамі.
Вядома, што ў калоніі Вацлаў Арэшка праз узрост вызвалены ад працы на вытворчасці, ён часта звяртаецца па дапамогу да дактароў. У палітвязня праблемы са зрокам, нават лісты дамоў пішуць іншыя вязьні па ягонай просьбе.
Вацлава Арэшку затрымалі 19 красавіка 2022 года. У той дзень адначасова былі арыштаваныя кіраўнікі і найбольш вядомыя актывісты беларускіх незалежных прафсаюзаў. Амаль праз год, у студзені 2023-га, Вацлаў Арэшка быў асуджаны на 8 гадоў зняволення ва ўмовах узмоцненага рэжыму. Сярод трох артыкулаў Крымінальнага кодэкса, паводле якіх асудзілі актывіста, быў артыкул 361-1 пра стварэнне «экстрэмісцкага фармавання» і ўдзел у ім.
Гэткім фармаваннем беларускія ўлады прызналі прафсаюз РЭП (Беларускі прафсаюз работнікаў радыёэлектроннай прамысловасці), у якім Арэшка рэдагаваў бюлетэнь прафсаюзаў РЭП.
Цяперашні палітвязень калоніі «Ваўчыныя норы» Вацлаў Арэшка таксама вядомы як дзеяч беларускай культуры, ён займаўся рэдактарскай і літаратурнай дзейнасцю.
Вацлаў Арэшка працаваў у Тэатры юнага гледача і Нацыянальным мастацкім музеі, выкладаў у Беларускай дзяржаўнай акадэміі мастацтваў, распрацаваў праграму новага навучальнага курса «Гісторыя і тэорыя культуры Беларусі», вёў раздзел кніжных і камп'ютарных рэцэнзій у «Нашай Ніве», рэдагаваў электронны сайт-архіў «Вытокі», выступаў як актывіст ініцыятывы «Эксперты ў абарону Курапатаў», ініцыяваў стварэнне «Кнігі гонару Курапатаў» у памяць пра ахвяр рэпрэсій.
Як літаратар Вацлаў Арэшка друкаваўся ў часопісах «Спадчына» і Arche, перакладаў са старапольскай мовы творы беларускага барока.
Цяпер чытаюць
Іллю Дубскага ў калоніі прымусілі самому сабе лязом зрэзаць татуіроўку з Пагоняй4
Каментары